O Bloque Nacionalista Galego, a través da súa senadora Carme da Silva, pon en valor as bonificacións históricas conseguidas para a AP-53, incluídas no Acordo de Investidura do BNG, que permitirán rebaixas de até 75% para as persoas usuarias desta autoestrada e que entrarán en vigor neste mes de abril. Trátase dunha medida sen precedentes, sinala a senadora do BNG, que pon fin a anos de discriminación e abandono por parte dos gobernos españois, que nunca impulsaron ningún tipo de rebaixa nesta infraestrutura.
Durante unha visita á comarca do Deza, a senadora do BNG estivo pola deputada do BNG no Parlamento de Galiza, Ariadna Fernández; o responsábel comarcal, Xoan Blanco, a vicerresponsábel comarcal, Carme Fidalgo, así como concelleiros do BNG na comarca, Paco Vilariño, Alex Fiuza, Carlota Salgado, Susana Tato e Xerardo Díaz.
A senadora do BNG, Carme da Silva, subliña que "este é un avance froito do traballo serio, da negociación e do compromiso do BNG coa Galiza. Cando o BNG ten forza, hai avances reais para a nosa xente. Sen o BNG, isto non existiría. O noso obxectivo é garantir que os galegos e galegas teñan as mesmas condicións e dereitos que calquera outro territorio do Estado, e estas bonificacións son un paso importante nesa dirección".
Rebaixas “históricas” para a AP-53 tras anos de abandono
Esta autoestrada, chave para a comunicación galea, levaba anos sen recibir ningunha medida de apoio para abaratar o seu custe e sendo unha das máis caras do Estado: a máis cara do Estado por quilómetro. "O BNG tivo que chegar a Madrid para poñer sobre a mesa unha demanda histórica da nosa xente” destaca Carme da Silva. O compromiso do BNG, neste sentido, é claro: “traballar para mellorar a vida das galegas e galegos todos os días" reafirma da Silva.
O PP, responsábel do castigo ás persoas usuarias da AP-53
A senadora do BNG, especialmente crítica co Partido Popular ao que responsabilizou directamente do maltrato que sufriron as persoas usuarias da AP-53 durante anos: “o PP foi o partido que decidiu que esta autoestrada fose de pago e que, malia gobernar moitos anos en Madrid, nunca aprobou ningunha bonificación. Á diferenza do PP, que sempre se puxo do lado das concesionarias, o BNG está do lado da xente" afirma Carme da Silva.
Da Silva insiste en que "frente ao abandono do PP e á falta de compromiso, tivo que ser o BNG quen, coa súa forza negociadora, conseguise estas bonificacións que suporán un alivio económico para milleiros de galegas e galegos que usan a AP-53 a diario".
Máis forza para o BNG, máis avances para Galiza
Finalmente, a senadora nacionalista sinalou que a loita non remata coas bonificacións conseguidas polo BNG no Acordo de Investidura. “As bonificacións son só un primeiro paso, pero o noso obxectivo final debe ser acabar con estas peaxes inxustas e unha autoestrada completamente galega. E iso só será posíbel se o BNG segue sendo unha forza determinante en Madrid" finda Carme da Silva.
