A portavoz nacional, Ana Pontón, reclamou ao Goberno de Alfonso Rueda que “actúe de inmediato” para evitar o peche da emblemática fábrica de Sargadelos en Cervo porque a súa desaparición suporía “moito máis que o peche ordinario dunha empresa” dado que Sargadelos é “marca de País e un símbolo nacional de Galiza”.
Pontón considerou “incomprensible” a “morna resposta” do Executivo do PP que se limitou a emitir un comunicado de prensa fronte a un anuncio que suporía pechar unha factoría que, ademais, é Ben de Interese Cultural (BIC) e representa moito máis que unha fábrica de cerámica de extraordinaria calidade. “Estamos falando de 200 anos da historia de Galiza”, recalcou.
“Este tema require da máxima implicación da Xunta e o que esperamos é algo máis que un comunicado porque, evidentemente, ten mecanismos para poder intervir e este é un momento no que se debe actuar con todas as ferramentas legais de negociación e políticas que ten o Goberno galego”, afondou.
A líder nacionalista destacou en rolda de prensa que Sargadelos é “un emblema cultural e artístico de Galiza” e un referente económico da industria galega na que entran en xogo outras consideracións a ter en conta para reclamarlle ao Executivo que “tome cartas no asunto”.
Neste sentido, recordou que a firma recibiu máis de medio millón de euros de axudas públicas, ademais dun crédito subvencionado de 600.000 euros, investimento público vinculado a que e garante a actividade económica e o emprego, tal e como entende o BNG xa que, subliñou, “cando se financia a empresas con recursos públicos ten que haber ese retorno en termos de actividade produtiva e de emprego”.
En segundo lugar, Pontón lembrou tamén que a Xunta formou parte do padroado da Fundación Sargadelos que, por certo, abandonou cando a parella do entón presidente Alberto Núñez Feijóo, foi contratada polo novo propietario, e que tanto a Fundación como o padroado recibiron tamén fondos públicos.
Por último, recalcou que a empresa garda, ademais das fábricas de Cervo e Sada, “unha parte esencial do patrimonio material e inmaterial de Galiza”, desde os seus edificios, declarados BIC, ate o legado patrimonial e artístico de referentes indiscutibles nas vangardas artísticas do País como Isaac Díaz Pardo, Luís Seoane ou Carlos Maside.
“Todas estas son razóns que xustifican, aínda máis, que o Goberno do PP actúe e interveña para aclarar as circunstancias nas que se anuncia o peche da planta de Cervo despois dunha inspección de Traballo que, en ningún caso, xustifica esta medida e estas actitudes impropias dun Estado de Dereito”, indicou Pontón, quen recordou ademais que todas as informacións coñecidas constatan o “bo momento económico” no que se atopa unha firma que ten “un gran valor de marca” e unha presenza internacional consolidada.
A portavoz nacional trasladou todo o apoio do BNG aos traballadores e traballadoras de Cervo e recalcou que “ninguén está por riba da lei”, senón que, ao contrario, “a lei está para cumprirse”, incluída a normativa que garante a saúde do persoal traballador no seu centro de traballo.
A líder nacionalista avogou por “manter e protexer” o patrimonio de Sargadelos como “parte do patrimonio colectivo do País” e garantir o mantemento do emprego nunha comarca como A Mariña, que ademais vén sufrindo nos últimos anos “perdas constantes” no seu tecido industrial.
Neste sentido, anunciou que o Bloque xa rexistrou diversas iniciativas no Parlamento con este obxectivo, así como a solicitude de comparecencia da conselleira de Industria, co fin de abordar a situación e contribuír dende a Cámara a evitar que se consolide o anuncio de peche da fábrica de Cervo. “Sería un auténtico despropósito e unha enorme perda para Galiza”, concluíu.
