O deputado do Bloque Nacionalista Galego, Paulo Ríos, denunciou na Comisión 2ª, Ordenación Territorial, Obras Públicas, Medio Ambiente e Servizos do Parlamento, a crecente desigualdade que afecta ás pequenas e medianas empresas do sector do transporte de viaxeiros por estrada en Galiza e demanda á Xunta do PP medidas urxentes para garantir a supervivencia destas empresas e frear a concentración do sector en mans dunhas poucas grandes compañías.
Ríos sinalou que a posta en marcha do Plan de Transporte de Galiza “supuxo unha transformación significativa no sector”, especialmente no modelo de concesións. Actualmente, os contratos están maioritariamente en mans de Unións Temporais de Empresas (UTEs), onde as grandes compañías impoñen o seu dominio en detrimento das pequenas e medianas empresas galegas. “Esta situación está a ser denunciada polo propio Consello de Contas, que advirte do risco de monopolización do sector e da desaparición progresiva de moitas empresas” salientou.
"A fórmula das UTEs, en lugar de servir para favorecer a participación equitativa, está sendo utilizada polas grandes empresas para acaparar os contratos públicos e excluír ás pequenas e medianas compañías", denuncia o portavoz de transporte do BNG. Esta realidade compromete o futuro do sector, pon en risco o emprego nas comarcas galegas e prexudica a calidade do servizo público de transporte.
Ante esta situación, o deputado nacionalista exixiu ao goberno do PP adoptar medidas para corrixir a desigualdade entre pequenas e grandes empresas. O BNG pide rectificar o modelo actual e a impulsar políticas que aseguren a igualdade de oportunidades nas licitacións públicas, garantindo un transporte público sustentable e un tecido empresarial máis equilibrado en Galiza.
