A deputada do BNG, Noa Presas propuxo hoxe ao goberno, a través dunha proposición non de lei, “ampliar as categorías para as axudas ás mulleres vítimas de violencia de xénero e aumentar ás contías a percibir.”
O BNG conseguiu un acordo para crear “un novo tramo que inclúa aquelas mulleres con renda igual ou menor a 2 veces o IPREM como punto de partida, engadindo as posíbeis situacións complementares (menores a cargo, discapacidade e dependencia) xa recollidas nas bases reguladoras e que tome como punto de partida a contía de 200 euros”. Coa creación desta categoría, inclúense mulleres vítimas de violencia que ata agora non podían acceder ás axudas.
Ademais, o BNG tamén conseguiu que prosperara a aplicación do acordo na convocatoria do ano 2019.
Presas insistiu na necesidade de incrementar os recursos para mulleres vítimas de violencia de xénero e considerou que destinar “un millóns e medio de euros dun orzamento de 9.849 M€” do orzamento xeral”, é perfectamente asumible. Porque estamos, dixo, ante “un problema de dereitos humanos”.
“Menos lazos morados e máis recursos económicos. Menos declaracións institucionais e máis feitos” manifestou a deputada tras lembrar que o BNG xa defendeu o incremento das contías orzamentarias en sesión plenaria, proposta rexeitada polo Partido popular.
Onte, explicou, a deputada, rematou o trámite dos orzamentos, pero a ninguén se lle escapa que moitas das decisións que podemos tomar neste Parlamento para mellorar a vida das persoas serán realidade só se lle adxudicamos unha dotación económica e converter así as palabras en realidade.
Ademais, temos unha lei pioneira, un instrumento útil pero que o Partido Popular incumpre nunha das súas cuestións básicas, “a atención psicolóxica primaria”. Unha lei que despois dunha década de ser aprobada segue sendo vangarda en moitos aspectos. Para o BNG, é un compromiso estar á altura das 55.000 denuncias por violencia machista da última década. “Temos que estar á altura de Magdalena Moreira, de María Judith Martins, de Ana Belén Varela Ordóñez, das 3 asasinadas que levamos ás costas neste 2018” polo que pediu ao Partido popular que rectifique nos recortes que aplicou o goberno. Unha das primeiras decisións do goberno de Núñez Feixóo ao chegar á Xunta, foi “recortar as axudas ás mulleres vítimas de violencia de xénero”.
A FORZA DO FEMINISMO
A deputada salientou a forza do feminismo nas rúas e a maior conciencia da sociedade contra a violencia de xénero. Para nós, afirmou, representa unha vitoria das organizacións de mulleres e das feministas que estamos nas institucións. Cando miremos atrás, “decatarémonos do verdadeiro significado do cambio social trala pasado 8 de marzo”. Depende agora de nós, “contribuír a que este Parlamento e a Xunta de Galiza estea á altura ou non das circunstancias históricas”, sentenciou.
