Bloque Nacionalista Galego, xunto con Esquerra Republicana, Euskal Herria Bildu, EAJ-PNV, Junts per Catalunya, Compromís, Geroa Bai e Eivissa i Formentera, rexistra unha proposta de Reforma do Regulamento do Senado alternativa co obxectivo de garantir a utilización plena e normalizada do galego, o catalán, o occitano (aranés no Vall d’Aran) e o euskera na actividade da cámara alta.
As organizacións políticas de territorios con linguas diferentes do español con representación na cámara coinciden na necesidade “de impulsar as reformas regulamentarias no Senado co fin de garantir definitivamente o dereito das e os representantes públicos a realizar o seu labor parlamentario en todas as linguas oficiais do Estado”.
O obxectivo da Reforma do Regulamento que se propón como texto alternativo ao presentado polo Partido Popular, ten como obxectivo “corrixir a grave vulneración de dereitos” que supón a prohibición do uso do galego, o catalán e o euskera no Senado, e, á vez, “conseguir o normal e pleno desempeño das e dos representantes públicos na cámara de representación territorial”, xunto coa promoción da riqueza derivada da pluralidade lingüística, así como o dereito da cidadanía para ser atendida na lingua oficial que elixa.
Entre as modificacións que recolle a Reforma inclúese que “os senadores e senadoras poderán intervir no Pleno, nas comisións e en toda a actividade parlamentaria, nos órganos funcionais do Senado, así como en todos os seus órganos reitores, e nos actos e actividades de representación oficial en calquera das linguas que teñan o carácter de oficiais nalgunha Comunidade Autónoma de acordo coa Constitución e o correspondente Estatuto de Autonomía”.
Nesta mesma liña, “calquera senador ou senadora terá dereito a interpelar o Goberno en calquera das linguas oficiais, así como a formular ao Goberno preguntas, -mediante escrito dirixido á Presidencia da Cámara-, e a recibir a resposta correspondente ás preguntas de contestación escrita dentro dos trinta días seguintes á súa comunicación, na lingua en que se formularon estas preguntas escritas”.
