O Bloque Nacionalista Galego (BNG) exixe ao Goberno do Estado actuar con rapidez e aprobar un novo Real Decreto-lei que permita recuperar as bonificacións ao transporte ferroviario e garantir a suba das pensións. Esta solicitude xorde após o rexeitamento por parte do PP, VOX e Junts á validación do Real Decreto-lei ómnibus que contiña medidas esenciais para a protección social e económica da cidadanía. Así mesmo, Néstor Rego responsabiliza o PP de que máis de 689.000 pensionistas vaian cobrar 30 euros menos a partir de febreiro, se non se solucionar o problema, e de abandonar a máis de 80.000 galegos e galegas usuarias do transporte público.
O deputado do BNG no Congreso, Néstor Rego, reclama que o Goberno cumpra, entre outras cuestións, co pactado no Acordo de Investidura e adopte medidas inmediatas que permitan “dar continuidade ás axudas ao transporte público e á actualización das pensións, vitais para millares de familias en situación de vulnerabilidade”.
Consecuencias para a Galiza polo voto en contra do PP
O BNG denuncia que a decisión do PP, en complicidade con VOX e Junts, afecta gravemente á Galiza. “Máis de 689.000 galegos e galegas verán reducida a súa pensión en aproximadamente 30 euros mensuais a partir de febreiro, se non se corrixir este problema. Isto supón un golpe directo aos dereitos sociais e ao benestar de quen máis o necesita” evidencia Néstor Rego.
Así mesmo, continúa explicando o deputado do BNG, máis de 80.000 galegos e galegas que usan habitualmente o transporte público veranse gravemente prexudicados pola caída das bonificacións, o que supón un aumento no custo dos seus desprazamentos e unha maior carga económica para as familias traballadoras.
Rego: “O Goberno debe actuar xa”
Néstor Rego advirte que é responsabilidade do Executivo central garantir a continuidade destas medidas. “O rexeitamento ao Real Decreto-lei non pode ser a escusa para abandonar millares de persoas na Galiza e en todo o Estado. O Goberno ten a obriga de aprobar un novo texto que recolla estas axudas e cumpra co compromiso adquirido co BNG e coa cidadanía” afirma.
O BNG reitera o seu firme compromiso coa defensa dos dereitos sociais e exixe ao Goberno actuar con valentía para rectificar esta situación inxusta, que castiga a maioría social.
