O cabeza de lista do BNG, pola provincia da Coruña, Xosé Luís Rivas defendeu hoxe en Padrón medidas para incentivar o comercio de proximidade e impulsar o consumo de produtos locais para reactivar a economía das cidades e vilas galegas.
Acompañado da concelleira nacionalista en Padrón, Bea Rei, o concelleiro en Dodro, Xoán Bautista e membros do BNG da comarca, o candidato nacionalista visitou a praza de abastos e comercios da vila onde mantivo encontros cos propietarios e propietarias dos negocios para transmitirlle as propostas do BNG neste ámbito.
O nacionalista destacou as vantaxes do pequeno comercio, as prazas e os mercados “con produtos frescos e galegos”, mercados, dixo, que precisan apoio económico e incentivos á compra dos produtos locais e a súa distribución.
Por outra parte, insistiu na necesidade de seguir poñendo en marcha a rehabilitación dos mercados e a peanolización de espazos públicos que favorezan a actividade comercial. Temos que “defender o noso, o propio, e dar valor a esas pequenas producións”, recalcou.
O pequeno comercio, as prazas de abastos e os mercados “dinamizan e poñen en valor a produción propia” ademais de fomentar as relacións sociais e crear riqueza a diferencia das grandes multinacionais de distribución. O comercio local paga os seu impostos que logo reverten nos concellos e resulta imprescindible a defensa deste modelo como “motor económico de moitas cidades e vilas galegas”.
O candidato do BNG insistiu en que é necesario consumir produtos galegos e mercar en comercios de proximidades sobre todo, dixo, agora que pasamos por “un confinamento que obrigou a algúns comercios a pechar as súa portas”.
“O comercio local dá saída aos produtos de proximidade e o tecido comercial xera vida nas localidades”. Rivas anunciou que o BNG utilizará todos os medios, ao seu alcance, para poñer en marcha un paquete de medidas con incentivos para os mercados de produtos agrícolas e de gran calidade.
Tras a súa visita a Padrón, Rivas animou novamente a mercar produtos galegos nos mercados semanais e sobre todo, ás persoas das cidades que aínda descoñecen os produtos que os mercados lles poden ofrecer.
O BNG demanda melloras no edificio da Praza de Abastos e diversificar o mercado dominical
Pola súa parte, a concelleira do BNG de Padrón, Bea Rei transmitiu ao candidato un dos problemas no comercio da vila agravado pola COVID-19 que provocou o descenso de asistentes ao mercado dominical, á praza de abastos e comercio en xeral. Nesta liña, explicou que o BNG presentou diversas iniciativas no concello para axudas específicas ao comercio entre as que destacou: a “supresión de taxas municipais”, organizar feiras e mercados específicos, rehabilitar o edificio da praza de abastos e planificar unha ordenanza que clarifique aos comerciantes cal é o espazo de venda que lle corresponde, ademais de medidas que garantan a seguridade das persoas que accedan á praza de abastos con entradas e saídas marcadas e subministro de hidroxéles, tapa bocas e luvas. “ Reclamamos na porta de entrada da praza de abastos material de protección e na porta de saída un contenedor de residuos”.
Sobre o mercado dominical, o BNG de Padrón, explicou Rei demandamos a súa diversificación aproveitando os lugares públicos para ofrecer produtos “ecolóxicos” e converter Padrón nun “lugar de referencia”. Queremos, tirar o maior partido a agricultura local e para iso precisamos favorecer a saída do “excedente local” dos produtores da zona de Herbón coa denominación de orixe así como o resto de “agricultura de zona e tempada”.
