A deputada do BNG Rosana Pérez pediulle explicacións á secretaria xeral técnica da Consellería do Mar, Marta Barreiro, sobre o grao de execución dos fondos europeos de 2023 nun contexto no que o sector se encontra nunha situación “alarmante”. Fíxoo na comisión 8ª, onde reclamou ao Goberno de Rueda que se centre en destinar os cartos do Fondo Europeo Marítimo e de Pesca (FEMP) a proxectos concretos da economía real e non só “a publicidade, feiras e eventos”.
Pérez lamentou que a Xunta do PP devolva centos de millóns que deberan servir para potenciar un sector que en Galiza é fundamental e que en realidade -aclarou- “foron parar a unha maraña de burocracia eterna e a non estar a disposición de quen realmente os necesita, o sector pesqueiro - o extrativo sobre todo-, as pequenas e medianas empresas e os pequenos autónomos”.
E é que, tal e como recolle o informe do Consello de Contas do pasado mes de setembro, o grao de execución dos fondos da UE en Galiza en 2022 foi do 47,3%, moi por detrás da media do Estado, co 58,08%, e moi por detrás tamén da execución noutras consellarías. O informe constata ademais que ‘esta inexecución provoca que as axudas non cheguen de maneira efectiva á economía real’.
A portavoz de Mar do BNG asegura que a formación nacionalista xa vén alertando desta “nefasta xestión”, presentado iniciativas no Parlamento galego ao ver que os cartos, “malia os anuncios en bucle por parte da Consellería, non chegaban ás necesidades do sector”.
Quixo saber en concreto cantos dos máis de 371 millóns de euros que lle correspondían a Galiza do FEMP no período 2014-2020 se executaron, e que medidas tomaron e con que resultados, despois da creación en 2021 dunha nova Subdirección Xeral de Planificación, Seguemento e Verificación do FEMP. Un departamento que naceu “xusto no 2021, despois de ver que a xestión dos fondos era ineficaz e que ían máis cartos de volta dos que quedaban aquí”, subliñou.
Pérez tamén se interesou polos datos de execución de fondos en 2023 e pola valoración que fai dos mesmos a Consellería do Mar, sobre todo despois de terse creado esta Subdirección Xeral de Planificación, Seguemento de Verificación dos FEMP: Incidiu en se serviu para mellorar o aproveitamento dos fondos e preguntou que fixo exactamente para mellorar, “se é que mellorou”, engadiu.
Na iniciativa, o BNG tamén preguntaba pola data da posta en marcha das oficinas de información e asesoramento do Fempa, “que levan anunciando por terra mar e aire, desde 2022, que se adxudicaron en setembro de e 2024 e que vén de inaugurar a bombo e prato polo presidente da Xunta o mes pasado” pero que aínda non botaron a andar. “Non son eficientes en executar os fondos e moito menos para cumprir as súas propias promesas”, recriminou.
Ante “anos e anos de non levar acabo as súas obrigas dilixentemente”, a deputada quixo saber que vai facer a Conselleira, ademais de anuncios e propaganda, para que non se perdan os fondos europeos e cheguen a quen realmente van destinados.
Debacle no sector marisqueiro
Rosana Pérez preguntoulle, por outra banda, á nova directora xeral de Pesca, Patricia García, pola valoración que fai a Consellería da situación actual do conxunto do sector do mar así como pola opinión que lle merecen os datos da propia Xunta que falan da baixada de vendas e facturación nas lonxas galegas, así como da perda de postos de traballo no sector, unha situación que a deputada nacionalista cualificou de “debacle”.
E é que os datos oficiais publicados na Plataforma Tecnolóxica da Pesca da Consellaría do Mar constatan unha caída nas vendas de peixe e marisco de case 24.000 toneladas, un 18% menos ca no 2023, cunha baixada de máis de 30 millóns de euros na facturación, un 7,5% menos ca ano anterior. Tamén sinalan a redución de 222 permisos de marisqueo a pé, un 6,3% menos e só un ano. “É unha catástrofe”, asegurou, porque en que empresa, se se perdesen 222 postos de traballo nun ano non se tomarían medidas?” preguntou.
Á deputada faltáronlle cualificativos para describir o “descalabro” que segundo afirmou,significa a rencición da propia Consellería do Mar diante das evidencias e diante dos datos". Salientou que, nas ordes de axuda elaboradas pola Xunta "ano e cada vez con máis dificultades para qeu o sector acceda a elas", unha cousa é "o que se orzamenta e outra o que se executa" afirmou, lembrando que durante a Covid dos 5.200.000 de euros presupostados só se executaron 142".
Lembrando que o sector marisqueiro é competencia exclusiva da Xunta Pérez advertiu que, despois de telo pedido hai case un ano, o BNG non ten coñecemento do Plan de Competitividade do Marisqueo.
Son datos que para o BNG certifican a falta dunha verdadeira política pesqueira por parte do Goberno de Rueda e un rotundo fracaso da Conselleira do Mar que non fixo nin ten como obxectivo prioritario potenciar un sector vital e do que dependen miles de postos de traballo directos e indirectos en Galiza.
“Como pode un goberno que ten o sector pesqueiro e marisqueiro máis potente de todo o Estado, renderse e dicir que non ten máis medidas que a de zona catastrófica ou o Plan de Competitividade”, recalcou.
