A viceportavoz do BNG no Parlamento, Olalla Rodil, esixiu ao PP que dea marcha atrás co anteproxecto de lei da Corporación Radio e Televisión de Galiza (CRTVG) porque, advertiu, tal e como está suporía “un retroceso democrático brutal”. “Pedímoslle ao Partido Popular que dea marcha atrás na reforma da lei e que non se atreva, nin sequera, a presentar tal despropósito”, asegurou.
Rodil denunciou que “despois de anos facendo da CRTVG o seu terminal de propaganda”, o Goberno de Rueda prepara unha reforma lexislativa feita “a medida dos intereses do PP co único obxectivo de facerse co control absoluto da radio e da televisión públicas de Galiza”. Para iso, o PP ten xa redactado un proxecto de lei con “tres finalidades moi claras” : controlar a dirección da corporación poñéndoa ao servizo do PP, eliminar os órganos de participación profesionais, e abrir a porta dos medios públicos de Galiza a linguas distintas do País, subliñou a deputada nacionalista.
Segundo criticou Rodil, o texto do anteproxecto permitiría o nomeamento da Dirección Xeral da CRTVG cos únicos votos do PP, dando carpetazo á lei de 2011, que fixa unha maioría reforzada do Parlamento (45 votos) para a elección deste órgano, o que implica o apoio de máis dun grupo da Cámara. Unha lei, a do 2011, que o PP “leva boicoteando desde a súa entrada en vigor” até o punto de que o actual director da CRTVG, Alfonso Sánchez Izquierdo, mantén o seu cargo “nunha situación de interinidade vitalicia”, reprobou.
A viceportavoz do BNG emprazou así ao PP, non só a retirar o anteproxecto, senón tamén a pór fin a actual “anomalía democrática” e lembrou que o BNG xa presentou en diferentes ocasións no Parlamento propostas para iniciar as negociacións políticas necesarias para elixir unha dirección xeral da CRTVG que respondese aos principios de pluralidade, transparencia e profesionalidade.
A norma que o PP quere aprobar no Parlamento, tal e como transcendeu na prensa e o BNG puido contrastar, prevé ademais suprimir o Estatuto Profesional e o Consello de informativos previsto na lei de 2011 como órgano interno de participación dos profesionais da información da corporación para velar pola súa independencia, a veracidade e a obxectividade.
“Despois de máis dunha década negándolles os dereitos ás e os profesionais, despois de 8 anos de mobilización do persoal da CRTVG na Plataforma Defende a Galega reclamando a garantía dos seus dereitos profesionais para cumprir coa misión de servizo público que teñen, agora o PP pretende fulminar calquera atisbo de participación profesional que poida contradicir a liña editorial que marque o partido”, denunciou Olalla Rodil, que quixo lembrar que todos os medios públicos da nosa contorna, desde a EiTB, até a BBC, teñen órganos como o que quere eliminar o PP de Rueda, creados para que o cadro de persoal poida traballar sen inxerencias garantindo a súa independencia.
Ataque frontal e sen precedentes aos dereitos lingüísticos
“É gravísimo”, agregou a deputada do Bloque, quen advertiu que o PP de Rueda “non ten un só límite”, como se demostra en que coa súa reforma queira chegar “até onde agora non se atreveu a ir ninguén até o de agora”, apuntou en alusión ao “ataque frontal e sen precedentes” aos dereitos lingüísticos do País que suporía abrir a porta da radio e a televisión públicas a outros idiomas distintos da lingua galega.
Unha medida que, subliñou, suporía “atacar a liña de flotación dos medios públicos” de Galiza, pois a promoción e a normalización da lingua galega é un dos principios fundacionais da CRTVG, que quedaría así “desnaturalizada”.
Rodil salientou que nos últimos 15 anos o PP xa “arrastrou a CRTVG polo chan triturando dereitos das e dos profesionais, aos que perseguiu laboralmente por atreverse a denunciar o que está facendo o PP cos medios públicos deste País”, convertendo os servizos informativos “no seu terminal de propaganda” e negando non só os dereitos dos seus traballadores senón tamén da cidadanía.
Un dereito a defender, como a sanidade e a educación
É por iso que, diante da gravidade dos plans do Executivo popular, a deputada nacionalista fixo unha chamada á sociedade galega para que se mobilice na defensa dos medios de comunicación, a través, por exemplo, do seu apoio á Iniciativa Lexislativa Popular impulsada por máis de 40 organizacións e entidades sociais para devolver a radio e televisión de Galiza “aos seus únicos e lexítimos propietarios, as galegas e os galegos”. “Porque a CRTVG é un dereito, un servizo público igual que a sanidade e a educación, e non podemos permitir que o PP a secuestre desta maneira”, concluíu.
