O deterioro da sanidade pública e o escurantismo que rodea a tramitación da macrocelulosa de Altri en Palas de Rei centrarán as iniciativas do BNG no Pleno da vindeira semana, no que o PP volveu vetar a comparecencia do presidente da Xunta, Alfonso Rueda, para dar explicacións aos galegos e as galegas sobre a “bomba ambiental” que queren implantar no corazón do País.
Segundo anunciou a viceportavoz parlamentaria do BNG, Olalla Rodil, a sanidade será o asunto polo que a líder nacionalista, Ana Pontón, preguntará na sesión de control ao presidente da Xunta, que terá que responder, máis en concreto, por que as listas de espera no Sergas non deixan de aumentar co seu goberno. Segundo subliñou Rodil, os últimos datos oficiais —que non inclúen as listas non estruturais— apuntan que hai máis de 48.000 persoas agardando por unha cirurxía, case 200.000 por unha primeira consulta hospitalaria e arredor de 113. 600 por unha proba complementaria.
Ademais, denunciou, o tempo de espera é maior do que había antes da pandemia, de xeito que os galegos e as galegas teñen que agardar hoxe unha media de 67 días por unha operación, 13 máis que no 2019. A espera é case un mes superior á rexistrada antes da covid no caso dunha cita co e coa especialista.
Rodil criticou, neste punto, as explicacións que no anterior Pleno deu o conselleiro de Sanidade, Antonio Gómez Caamaño, quen xustificou o incremento das listas de espera no aumento da esperanza de vidas. “En vez de dimensionar os recursos dos que dispón o sistema sanitario, o PP propón esperar aínda máis do que xa tiñamos que agardar”, censurou Rodil, rexeitando o “auténtico despropósito co que intentan tapar que hoxe a sanidade pública ten menos recursos para atender á xente como se merece”.
A través dunha moción, O BNG pedirá, como medidas urxentes, que se dote de transparencia as listas de espera facendo públicos os datos das non estruturais, que son as listas negras ás que o Sergas manda a quen por diferentes razóns rexeita ser atendido na privada. Elaborar un plan de traballo con orzamentos, prazos e o persoal necesario será outra das propostas nacionalistas para mellorar os tempos no Sergas .
Situación gravísima no materno infantil de Ourense
Tamén en relación coa sanidade, o BNG levará a debate no Pleno a situación xerada no hospital materno-infantil de Ourense logo e que esta fin de semana caese parte do falso teito, “unha situación gravísima que demostra o estado no que se atopa o edificio”, advertiu Rodil, lembrando que xa houbo derrubamentos anteriores, como o ocorrido en decembro de 2023, cando se desprendeu un falso teito dun corredor que da acceso á unidade de partos. Entón, criticou, tiveron que pechar a única sala de parto nagtural que hai e tardaron seis meses en amañalo.
“Esta situación evidencia un problema estrutural no hospital da terceira cidade de Galiza, pero tamén deixa á vista os incumprimentos do PP porque despois de décadas con problemas, a Xunta anunciou a demolición do edificio pero mentiulle á cidadanía porque non puxo un euro nos orzamentos de 2025 para facelo”, salientou.
No que ten que ver con Altri, a viceportavoz nacionalista lamentou que máis unha vez o PP vete a comparecencia que solicitou o BNG do presidente da Xunta, Alfonso Rueda, que fuxe do Parlamento para non ter que dar explicacións aos galegos e ás galegas.
Malia iso, o Bloque recorrerá a unha interpelación para denunciar a opacidade coa que está actuando o PP desde a Xunta respecto á megacelulosa e preguntará especificamente polos acordos, até o de agora secretos, entre Altri e o Goberno galego a través da Sociedade Impulsa.
Rodil explicou, sobre esta cuestión, en outubro de 2021 Altri deu a coñecer un memorando de entendemento coa Sociedade Impulsa, participada maioritariamente pola Xunta, para a construción en exclusiva dunha unidade industrial con capacidade para producir anualmente 200.000 toneladas de pasta soluble e fibras sustentables. Segundo a empresa, “Altri foi a escolha da Impulsa para liderar este consorcio sendo resultado de um concurso internacional baseado en criterios técnicos, operacionais e estratégicos”.
Na información trasladada pola empresa nos seus documentos internos dise ademais que “a celebraçao do acordo definitivo depende da verificaçao de um conjunto de condiçoes precedentes que, a verificarem-se satisfatoriamente- o que se estima venha a ocorrer no decurso do segundo semestre de 2022 -criarao as bases para a sua formalizaçao”.
Estes acordos nunca se fixeron públicos, no que constitúe un exemplo da opacidade e falta de transparencia que caracteriza o xeito de actuar do goberno do PP, considerou Olalla Rodil antes de informar de que o BNG tamén formulará unha pregunta sobre as afectacións que a macrocelulosa terá no Camiño de Santiago, posto que a súa ubicación está prevista a escasos metros do Camiño Francés, declarado Patrimonio da Humanidade. “E nen sequera se solicitou un informe do Icomos”, reprobou.
O Parlamento non pode ser a leira particular do PP
Por outra banda, en resposta aos xornalistas, Olalla Rodil cualificou de “arbitraria e discrecional” a decisión da presidencia do Parlamento, “respondendo única e exclusivamente aos intereses do PP”, de impedirlle ao BNG levar convidados á tribuna da sala de Plenos ata o seguinte periodo de sesións, unha “sanción” da que o grupo parlamentario nacionalista non recibiu comunicación formal.
“Nós defendemos os nosos dereitos, porque isto pode parecer unha anécdota, pero é que realmente vemos unha deriva por parte do PP de uso do Parlamento como se fose a súa leira, cada vez achicando máis a posibilidade á oposición en xeral, pero concretamente o BNG, de desenvolver o noso traballo político”, concluíu.
