No corazón de Bruxelas, á entrada do Parlamento Europeo, hoxe berrouse “Altri Non”, nunha concentración convocada pola eurodeputada do BNG, Ana Miranda, quen destacou que o BNG non vai permitir que un proxecto altamente contaminante como Altri reciba fondos europeos para contaminar a nosa terra, o noso mar e o noso ar”.
“Non imos permitir que nos enganen. Os galegos temos que ser respectados e non poden facerse proxectos altamente contaminantes que se venden como se fosen proxectos verdes”, defendeu a eurodeputada galega, para quen os cartos que Altri quere recibir son imprescindibles para recuperar o río Ulla, apoiar as pequenas e medianas empresas que están nese territorio, potenciar o emprego, recuperar a ría de Arousa e apoiar a xente do mar.
Precisamente sobre a contaminación da macrocelulosa proxectada por Greenfiber en Palas de Rei Ana Miranda vén de presentar unha pregunta dirixida á Comisión Europea para a súa resposta escrita. Neste documento, a eurodeputada galega pregunta se a Declaración de Impacto Ambiental que acaba de recibir o proxecto é compatible coa correcta aplicación da Directiva de Hábitats, posto que Altri tería un gran impacto ambiental sobre tres especies de flora en perigo de extinción e sobre o río Ulla, o embalse de Portodemouros e a ría de Arousa.
Ofensiva nas institucións europeas
A eurodeputada galega está desenvolvendo unha intensa ofensiva contra este proxecto nas institucións europeas. Así, xa presentou varias preguntas dirixidas á Comisión Europea e solicitou en reiteradas ocasións unha reunión á vicepresidenta para unha Transición Xusta, Teresa Ribera, no obxectivo de coñeza de primeira man os argumentos contrarios á instalación de Altri en Galiza.
Esta ofensiva en Bruxelas comezou en abril de 2024 cun encontro celebrado na Comisión Europea entre unha delegación galega e representantes da CE, en concreto do Grupo Operativo do Mecanismo de Recuperación e Resiliencia e a Unidade de Cumprimento da Normativa Medioambiental. Nese encontro, os representantes da CE confirmaron que non foi presentada ningunha solicitude oficial por parte do Estado español e que en caso de que se introducira un proxecto destas características debería cumprir con todos os principios e esixencias de transparencia e tamén esixencias medioambientais e de conflito de intereses que ten un proxecto destas características.
A ofensiva nas institucións europeas continuou con diversas intervencións nas sucesivas sesións plenarias así como coa loita do BNG para que a denuncia presentada polos colectivos opositores a Altri sexa debatida na Comisión de Peticións da Eurocámara, posibilidade que foi boicoteada polos deputados da dereita e a extrema dereita.
