A eurodeputada do Bloque Nacionalista Galego, Ana Miranda, participou hoxe nun acto de apoio ao ex-presidente de Brasil Inacio Lula da Silva, no cárcere desde o pasado sábado, xunto a diferentes europarlamentarios de distintos grupos políticos como GUE e Verdes-ALE, así como representantes do Parlasur.
“Queremos denunciar o inxusto encarceramento do ex-presidente Lula por parte do xuíz Sergio Moro”, manifestou Miranda na súa intervención, ao tempo que asegurou que se trata dun “xuízo arbitrario” que forma parte dunha “forte persecución política e mediática, sobre todo desde TV Globo” que está vivindo o ex-presidente brasileiro .
Ana Miranda subliñou que esa persecución ten por obxectivo que Lula non volva ser candidato nas vindeiras eleccións debido a que un dos seus obxectivos fundamentais consistiu en “cambiar a axenda social de Brasil loitando contra a miseria e a pobreza”.
Neste sentido considerou ademais que as relacións que teña o Parlamento con países de América do Sur “non pode ser con golpistas”. “Como deputada da esquerda nacionalista europea queremos que a democracia volva a Brasil e tamén queremos demostrar que diante desta situación Europa non cala”, engadiu.
