O Bloque Nacionalista Galego celebra a creación e posta en marcha de dous novos xulgados especializados na loita contra a violencia machista en Galicia, que estarán situados en Santiago de Compostela e Ourense. Esta medida, froito do Acordo de Investidura conseguido polo BNG, supón un avance crucial para mellorar a atención e protección das vítimas, así como para reforzar a eficacia da loita institucional contra a violencia de xénero.
O Acordo de Investidura conseguido polo BNG recollía, entre os seus puntos, a creación de xulgados específicos para loitar contra a violencia machista. Ourense e Santiago figuraban como os primeiros a crear, nunha lista de até cinco cidades galegas.
“Este logro é o resultado da nosa capacidade de negociación e da firmeza coa que defendemos políticas en favor dos dereitos das mulleres e da igualdade real. A creación destes xulgados responde a unha necesidade histórica e a unha demanda reiterada dos colectivos feministas, profesionais da xustiza e vítimas da violencia machista” reivindica Néstor Rego.
Con todo, o deputado do BNG subliña que aínda queda traballo por facer. “No Acordo de Investidura tamén se recolle a creación de xulgados específicos en Lugo, Ferrol e Pontevedra, que seguimos a reclamar con determinación. É imprescindible garantir que todas as mulleres en situación de violencia teñan acceso a unha xustiza especializada e próxima, sen diferenzas territoriais” subliña Rego.
“O noso compromiso coa Galiza e coa defensa dos dereitos das mulleres segue intacto. Continuaremos traballando para que se cumpran na súa totalidade os acordos alcanzados e para que a loita contra a violencia machista sexa unha prioridade real en todas as institucións” sintetiza o deputado do BNG.
