O BNG propuxo incluír no pleno a creación dunha comisión de investigación ante os novos datos que afectan a altos cargos de ADIF. O PP argumentou que a cuestión xa fora debatida na Cámara
O portavoz do BNG, Francisco Jorquera tamén preguntará a Feijóo pola operación ruinosa da venda de Novagalicia Banco e o estrepitoso fracaso das xestións con PEMEX, con 21 barcos anunciados e só dous adxudicados
Francisco Jorquera lamentou hoxe que, por terceira vez, o Partido popular rexeitara a solicitude do BNG para que o pleno do Parlamento se pronunciara, na vindeira sesión plenaria, sobre a posibilidade de crear unha comisión de investigación das causas do accidente ferroviario de Angrois. Existen novos datos, e moitas preguntas sen responder que afectan a altos cargos de ADIF, amparan esta solicitude.
O parlamentario tamén se referiu os informes periciais que afirman que a curva de Angrois tiña un risco previsíbel e non tolerábel e con posibilidades de descarrilamento dun cada seis meses. 15.000 sinaturas pediron unha comisión de investigación porque existe a necesidade de que sexa esclarecida a verdade e se depuren responsabilidades, por xustiza e respecto á memoria das vítimas, enfatizou.
O BNG leva ao pleno a desastrosa operación con Novagalicia Banco e o fracaso con PEMEX
O portavoz do BNG preguntará a Feijóo se asumirá as súas responsabilidades pola venda de Novagalicia Banco a Banesco da que dixo, é a demostración do fracaso das súas políticas e unha ruína para Galiza.
Jorquera explicou que foron destinados 8.981 millóns de euros de fondos públicos para o seu saneamento e vendida a Banesco por 1.003, dos que hai que descontar os créditos fiscais que benefician os compradores. Agora, sabemos que no primeiro ano Abanca xa gañou 1.157 millóns de euros, case o dobre do que pagou pola entidade financeira galega.
Por outra parte, o nacionalista cualificou de fracaso estrepitoso os acordos con PEMEX co anuncio da construción de 21 barcos dos que só dous foron adxudicados. Ademais, criticou a intermediación de Feijóo pra que o estaleiro Barreras fose vendida á petroleira mexicana a prezo de saldo co fin de transferir tecnoloxía e potenciar a construción naval mexicana e agora PEMEX retira a carga de traballo anunciada para Barreras.
Á iniciativa do BNG, tamén serán debatidas: Unha moción relativa ás medidas sobre normalización lingüística, a transferencia de competencias en materia de lexislación laboral e as restricións do tráfico pesado nas estradas galegas derivado ás autoestradas de peaxe.
O BNG pide a dimisión de Rocio Mosquera
A preguntas dos xornalista sobre a dimisión en bloque dos membros da Comisión de Bioética por discrepar coa Consellería sobre as medidas correctoras das desigualdades en atención sanitaria, o portavoz do BNG reiterou que en diversas ocasións, esta forza política foi moi crítica coa xestión da titular de sanidade e mesmo pediu a súa destitución. O Presidente da Xunta, dixo, debe responder porque as recomendacións da comisión non foron atendidas e a conselleira dimitir por unhas políticas que cada vez degradan máis a sanidade pública. Esta, é unha razón máis para pedir o seu cese.
