O BNG celebrou un encontro nacional de cadros institucionais e orgánicos que congregou a cerca de 300 persoas no auditorio municipal de Rianxo, ás que o portavoz nacional, Xavier Vence, se dirixiu para salientar os dous grandes obxectivos da acción política que marcan a folla de ruta inmediata do BNG: loita sen tregua contra as políticas de recortes, involucionistas e regresivas do PP e da Troika, e afianzar a recuperación social do Bloque que apuntan as enquisas e camiñar con ese apoio cara unha Galiza soberana.
Imos ben, pero aínda temos que ir mellor, arrancou Vence.
En relación ao primeiro obxectivo, o dirixente nacionalista reafirmouse non que denominou Espírito de Riotorto, unha forma de facer política nesta conxuntura crítica baseada na prioridade social, na rebeldía cidadá e na insubmisión institucional, que Vence traduce en cinco puntos de acción política.
Demostrar claramente con feitos que estamos ao lado da maioría social, segundo, reforzar a estratexia de rebeldía e insubmisión ás políticas de recortes e de regresión fiscal do PP, terceiro, mostrar desde os concellos nos que goberna o BNG que é posible facer outras políticas con outras prioridades, cuarto, facer un uso valente das institucións sobre todo desde o poder municipal, que pode ser unha trincheira que complemente a loita da cidadanía na rúa. En quinto lugar, evidenciar que é necesario ser áxiles e oportunos nas respostas a inacabable batería de medidas contra o país e a cidadanía.
O que Feijóo e Rajoy chaman saír da crise é, en realidade, pasar do purgatorio temporal ao inferno permanente, advertiu Vence, posto que o PP está radicalizado é aproveita a crise para facer un cambio de modelo do estado do benestar, privatizando os servizos públicos, e un cambio do modelo competencial, cara a recentralización esmagante.
Coas políticas do Goberno estatal e da Xunta o único que medra en Galiza é o paro e a emigración, recalcou. Os recortes e as privatización son a suma de centos de decisións que, sen desmaio, executa Feijóo e Rajoy, coherentes entre si, para desmantelar o estado do benestar, denunciou.
O segundo obxectivo desta posta a punto da organización pasa por afianzar e avanzar na recuperación social do BNG que apuntan as enquisas, cunha estrutura cohesionada e ilusionada que traballa ao lado da cidadanía, dos colectivos e movementos sociais máis activos, na rúa, nos sectores públicos e nos centros de traballo.
Primeira opción fronte a dereita
Non imos rendernos porque o futuro de Galiza depende da nosa loita. Somos o partido da dignidade, dos que acreditamos no futuro deste país, salientou Vence, quen subliñou que nesa defensa é estratéxico avanzar na soberanía.
Unha soberanía que nos permita contar coas mellores ferramentas para decidir o noso futuro, defender os nosos sectores produtivos, para gobernar de acordo aos intereses da sociedade deste país, crear emprego e riqueza, conservar os servizos públicos e unha calidade de vida que faga que esta mereza a pena ser vivida, e vivida aquí, argumentou.
Vence concluíu a súa intervención antes os centos de cargos institucionais e orgánicos nacionalistas a traballar arreo para converter ao BNG na primeira opción fronte a dereita que representa o PP, é unha meta ambiciosa pero alcanzable, concluíu.
A este encontro nacional de cadros institucionais asistiron os integrantes do Consello Nacional, a dirección nacional de Galiza Nova, deputados e deputadas do Parlamento galego e do Congreso, concelleiros e concelleiras e integrantes dos Consellos comarcais.
Galería de imaxes do encontro nacional de cadros orgánicos e insitucionais en Rianxo.
http://www.flickr.com/photos/54585288@N07/sets/72157638209767943/