O portavoz do BNG denuncia o ataque á tutela xudicial efectiva que provocará a eliminación dos partidos xudicial prevista por Gallardón
O portavoz nacional do BNG, Xavier Vence compareceu hoxe, ante os medios de comunicación xunto a portavoz no Congreso, Olaia Fernández Davila e a portavoz de Xustiza no Parlamento galego, Tereixa Paz.
No transcurso da rolda de prensa, as deputadas presentaron diversas iniciativas contra a reforma da planta xudicial promovida polo Ministro de Xustiza, Alberto Ruíz Gallardón.
As deputadas nacionalistas aseguraron que de ir adiante a proposta do Partido popular, cidades como Vigo, Ferrol ou Santiago de Compostela e municipios cabeceira de comarca serán privados de partidos xudiciais o que provocará un autentico caos e o empeoramento do servizo á cidadanía.
Para as deputadas, o Partido popular debe paralizar esta reforma porque resta autonomía e incrementa gravemente os gastos da cidadanía no acceso á Xustiza así como a obriga de percorrer entre 120 e 130 Qms para iniciar calquera proceso xudicial.
Olaia Fernández Davila e Tereixa Paz defenderon unha xustiza en función do territorio e non a centralización proposta polo Goberno central, dende Galiza, afirmaron, é preciso que o Goberno galego se pronuncie contra este novo ataque e reclame a paralización inmediata da reforma.
Modelo recentralizador, inxusto e caro
Pola súa parte, o portavoz nacional do BNG pediu a retirada da reforma por incidir negativamente nunha planta xudicial á marxe do territorio, das CC.AA e contra a economía local e explicou que a modificación da lei persegue o oligopolio dalgúns bufetes madrileños fronte aos pequeno despachos de avogad@s ubicados nas localidades galegas.
Vence denunciou que o Goberno galego non está a cumprir coas obrigas estatutarias en materia de Xustiza e reclamou da Xunta iniciar os trámites para a súa transferencia.
Para o portavoz do BNG, a Xunta e o Goberno central manteñen a mesma estratexia, o goberno de Galiza, dixo, segue fielmente os ditados marcados por Madrid como demostran as reformas de Alberto Ruíz Gallardón e José Ignacio Wert.
Vence anunciou que o BNG seguirá reclamando a paralización das reformas de Xustiza e Educación nas distintas institucións e apoiará as mobilizacións da cidadanía galega contra estes novos ataques que supoñen un retroceso de décadas.
Proposta de Feijóo para reducir deputados
A preguntas dos xornalistas sobre a intención do Goberno galego de reducir o número de deputados/as na Cámara galega, o voceiro nacionalista manifestou que a intención de Núñez Feijóo é reducir a importancia dos poderes e laminar as competencias. Na súa opinión, diminuír a cifra de parlamentari@s non reducirá os custes, reducirá a relevancia política e institucional do Parlamento que é o quere facer o PP en Galiza, concluíu.