A diferencia entre a frota do cerco vasca e galega é que a primeira tivo detrás un goberno que negociou co sector unha postura para defender ante Madrid, e a segunda ten un goberno que se nega a reunirse cos representantes da frota e asume o preacordo do Ministerio de Pesca pese a ser rexeitado polo sector. Consecuencia, a frota vasca recibe o 50% da cota de xarda e xurelo, mentres que Galiza apenas acada un 25% das capturas totais.
O portavoz nacional, Xavier Vence, facía está síntese tras a reunión mantida cunha representación da frota do cerco, e interpreta o sucedido nas negociacións co Goberno central como un síntoma do nulo peso político que ten Feijóo á hora de negociar os intereses do país en Madrid, afrontando este asunto cun desleixo cada vez máis habitual cando se trata de abordar cuestións que afectan a Galiza.
Vence salienta que estamos ante unha cuestión que afecta ao futuro dun sector da frota galega formada por 154 embarcacións, máis de 1.200 empregos directos e que supera os 5.000 empregos indirectos en vilas mariñeiras altamente dependentes da actividade pesqueira. O BNG non acepta que a actitude de submisión de Feijóo a Madrid condene a esta frota e a esas vilas mariñeiras á ruína, e por iso reclamamos un reparto xusto das cotas de xarda e de xurelo por parte do Goberno central.
Neste sentido, ademais das iniciativas presentadas no Parlamento, o portavoz nacional reclama tres cuestións inmediatas: reunión da conselleira de Pesca coa frota, negociación dunha postura que beneficie ao cerco e impugnar o actual reparto de xarda e xurelo.
Ten que haber unha reunión co sector, fixar un acordo en base aos intereses da nosa frota do cerco e, finalmente, que o Goberno galego defenda con uñas e dentes ese acordo en Madrid, insistiu Vence. Neste sentido, reclamou a Feijóo e a Rosa Quintana unha reunión inmediata co sector e cualificou de inaudito que a conselleira de Pesca fago oídos xordos a petición do cerco pese a estar ameazado de morte.
Como fan outros gobernos, a Xunta ten que reunirse co sector, negociar un acordo e con iso ir a Madrid a defender os intereses da frota e non dar a calada por resposta, recalcou.
O dirixente nacionalista cualificou de absolutamente inxustificable que a Xunta non poña os intereses do sector encima da mesa e acepte as consignas do señor Cañete, bendicindo un preacordo que implica unha redución brutal das posibilidades de capturas, mentres aumentan para outras frotas do Estado.
Dun plumazo poden borrar á metade da frota galega, resumía a situación o patrón maior da Confraría de Sada, Andrés García, na reunión da frota do cerco co portavoz nacional, na que tamén asistiu o portavoz parlamentar de Pesca, Daniel Rodas, e o responsable de CIG-Mar, Xavier Aboi.