O deputado do BNG empraza á conselleira do Mar a desmentir os datos que confirman un novo agravio para a flota galega co aumento da cota da xarda
O deputado do BNG, Daniel Rodas compareceu hoxe ante os medios de comunicación onde anunciou o rexistro dunha iniciativa parlamentaria destinada a modificar os criterios do futuro reparto das cotas pesqueiras ao fin de beneficiar a flota galega, gravemente prexudicada polo último reparto
Rodas acusou á Conselleira do Mar de enganar, outra vez ao sector do cerco co novo reparto das cotas derivado do acordo entre a Unión europea e o Estado español, si non é certo o que digo, emprazo a Rosa Quintana a que o desminta publicamente.
Rodas repasou os datos relativos ao acordo que redundará en 1.450 Toneladas máis para o sector galego sen embargo, salientou que o acordo fixa un TAC de 1.240.000 toneladas de captura para 2014 e para os catro anos seguintes será o que recomende o ICES.
O novo reparto segue prexudicando á flota galega
Para o nacionalista, o novo reparto segue igual nas diferentes artes. Agora, explicou, a flota galega pasa a ter 1.400 toneladas máis pero o Pais vasco incrementa o seu tope en 3.300, o reparto segue aumentando as diferenzas.
Rodas acusou a Rosa Quintana e a Arias Cañete de vender un acordo de grande éxito cando en realidade seguen utilizando a Galiza como moeda de cambio.
O parlamentario manifestou o seu apoio incondicional ás reivindicacións da flota e reclamou unha reunión urxente do Consello Galego do Cerco, non só 19 representantes das 153 embarcacións.
Deben reunirse todos coa titular da consellería do Mar e non só os que Rosa Quintana quere escoitar. Ademais, advertiu que o reparto individual conduce á privatización dun dereito que é de todos.
A partir de agora, dixo, deben primar novos criterios para que as capturas históricas non representen o 70%, e o número de tripulantes permitiría unha distribución máis equitativa.
Rodas anunciou que a iniciativa do BNG inclúe a reclamación dun novo Plan de recuperación da sardiña que contemple paradas biolóxicas.
Finalmente , lembrou o acontecido esta semana no exterior do Parlamento galego e reprobou a brutal carga policial contra os armadores e mariñeiros que reclamaban na rúa un novo reparto de cotas de xarda e xurelo.