A deputada do BNG, Noa Presas acusou hoxe ao conselleiro de Industria, Francisco Conde de “facer publicidade” coas directrices enerxéticas mentres o goberno galego “impide situar a Galiza na vangarda do sector”.
Trala comparecencia do titular de Industria para explicar as directrices enerxéticas de Galiza, a nacionalista asegurou que as medidas carecen de “planificación e dun modelo propio”.
Para a deputada, as directrices no sector enerxético galego “veñen marcadas por Madrid que a Xunta obedece”. Neste sentido, instou ao conselleiro a plantarlle cara ao goberno central e trasladarlle que se alguén ten que pagar ás eléctricas, “non imos ser os galegos e galegas, terá que rascar o peto o señor Montoro porque nós non o imos facer”.
Presas explicou que recentemente o Tribunal Supremo remitiu ás comunidades un segundo auto para facer realidade as sentenzas polas que subirá o prezo da luz aos galegos e galegas. Vostede, recalcou, ven aquí hoxe falarnos de eficiencia e sustentabilidade cando na reforma da lei do sector eléctrico renunciaron á participación pública directa do sector, que tería evitado este problema. “ Non impugnaron o decreto” e a pesar das moitas propostas que o BNG trouxo ao Parlamento defendendo unha tarifa eléctrica propia para pagar menos de luz, vostedes “sistematicamente votaron en contra”.
Dende o BNG, reiterou, volvemos a pedirlle que abandone o “seu inmobilismo” e exerza a vía política para que Galiza non soporte máis custos. A nacionalista asegurou que as directrices enerxéticas presentadas hoxe por Conde “carecen de investimentos para mellorar as tecnoloxías e apostando polas renovables para camiñar cara a soberanía enerxética avanzando no autoabastecemento e capacidade de xestión”.
Presas reclamou retomar a participación pública “para obter beneficios a partir do control social dun sector estratéxico como o enerxético” e defendeu o dereito da electricidade para que ningún galego e galega “sufra pobreza enerxética”.
Deixe de “facer quen fan” e comprométanse a sitúar a Galiza na “vangarda do sector enerxético”. Non sigan presentando refritos de promesas xa anunciadas e poñan en riba da mesa compromisos porque levamos anos agardando a que as empresas se adapten ás comarcas e se reconvertan, entre as que destacou as centrais das Pontes e Meirama.
A deputada preguntou que pensa facer a consellería ante a disposición dos orzamentos polo que o Goberno promoverá mecanismos de apoio de até 10 millóns de euros para reducir ás emisións nos territorios do Plan do Carbón do que Galiza quedou excluída, circunstancia que cualificou de “novo agravio ao noso país”, concluíu.
