O BNG, após solicitar a comparecencia da Ministra de Vivenda no Congreso, a través do seu deputado reclamou ao Goberno desenvolver políticas públicas de vivenda efectivas e eficaces que permitan deter e reverter a espiral de encarecemento para o acceso á vivenda. Néstor Rego traslada a Isabel Rodríguez durante a comparecencia as medidas que o BNG defende: colocar no mercado o maior número de vivendas posíbel a prezo taxado, especialmente en aluguer; cesión gratuíta dos inmóbeis da SAREB e reformular o Plan Viena; regulación efectiva dos arrendamentos turísticos e de temporada ou limitar os xuros das hipotecas, entre outras.
A vivenda é, a día de hoxe, “un dos principais e máis graves problemas ao que se enfronta a clase traballadora, o conxunto das clases populares, especialmente a mocidade”. Por este motivo, e ante as declaracións da Ministra de Vivenda apelando á empatía e a solidariedade dos propietarios, o BNG xunto con ERC e Bildu, forzou a comparecencia de Isabel Rodríguez e instouna a desenvolver medidas que permitan atender e atallar este problema.
“O que é preciso son políticas públicas de vivenda efectivas e eficaces que permitan reverter esta espiral. O que precisamos é o impulso á política pública de vivenda, colocando o máis rapidamente posíbel no mercado un número suficiente de vivendas a prezo taxado, especialmente en réxime de aluguer” sinala o deputado do BNG durante a comparecencia da Ministra de Vivenda.
Ademais, Néstor Rego urxe Goberno a ceder de forma inmediata e gratuíta os inmóbeis desocupados da SAREB ás Comunidades Autónomas e Concellos que o soliciten. “Limitar de verdade o prezo dos alugueres e evitar a especulación; reformular o Plan Viena, estabelecendo como prioritario o criterio social; cumprir a totalidade dos compromisos anunciados en relación co impulso á vivenda pública; regular de forma efectiva os arrendamentos turísticos e de temporada; limitar os xuros das hipotecas, ou, mesmo apoio a iniciativas como as cooperativas de vivendas en cesión de uso” enumerou Rego.
Garantir na Galiza o acceso á vivenda
“A ‘mobilización’ de vivendas da SAREB debería implicar a cesión gratuíta a quen ten as competencias, porque xa pagamos por esas vivendas” defende o deputado do BNG. Pola contra, o Goberno limitouse a tentar vender ás CCAA e concellos. “No ano 2023 apenas foron cedidas 350 e, ademais, pagando” recorda.
Na Galiza, exemplifica Rego, a SAREB ten uns 3 000 inmóbeis, metade deles en condicións de seren habitados de forma inmediata ou en pouco tempo. “Cal é o problema para que sexan cedidos á administración galega para iniciar un programa de vivenda pública/social, especialmente en réxime de aluguer?” pregunta retoricamente.
Por outra parte, engade Néstor Rego, o Plan Viena elaborado polo Goberno -un programa co que a entidade pon ao dispor de investidores privados solos finalistas con capacidade para 10 600 vivendas- prima o criterio economicista no canto do interese social. “Estabelece condicións de rendibilidade para os investidores privados. Están a tempo de reformular o Plan e de priorizar o interese público e os usos sociais” empraza Rego a Rodríguez.
Nin Estado nin Xunta están a resolver o problema: a hemeroteca non mente
Rego lembrou que a Xunta do Partido Popular desatendeu durante anos a política de vivenda pública, con efectos desastrosos. “No caso da Galiza, o inmenso impulso que deu o BNG desde o goberno, entre 2005 a 2009, foi inmediatamente abandonado polo PP. Con todo, beneficiou aínda uns anos da inercia das vivendas proxectadas e en construción, mais cando esa inercia desapareceu a vivenda pública na Galiza tendeu a cero” subliña Rego No Plan de Vivenda entre 2015 e 2020, exemplificou o deputado do BNG, só se materializaron na Galiza gobernada polo Partido Popular 40 vivendas, “unha auténtica vergoña”, sentenciou.
Mais, na opinión do deputado nacionalista, o autodenominado “Goberno máis progresista da historia” nos últimos seis anos non actuou moito mellor, pois as súas políticas en materia de vivenda caracterizáronse esencialmente pola propaganda e pola “inacción e mesmo por actuacións que resultaron falladas”. A Lei de Vivenda, lembrou Rego tal e como xa advertira o BNG durante o seu debate e votación, ficou curta e resultou claramente insuficiente, e medidas como o “bono xoven” demostráronse mesmo contraproducentes, provocando un efecto non desexado de incremento dos prezos. Por iso o BNG insiste en propostas que son imprescindíbeis para resolver de verdade o acceso a unha vivenda digna.
