Carme Adán explicou que a lei nacionalista avanza na loita contra a discriminación laboral, desenvolve a igualdade e insta aos poderes públicos á sensibilización e formación no eido da corresponsabilidade
A deputada do BNG, Carme Adán presentou hoxe ante os medios de comunicación a Lei de Corresponsabilidade do BNG destinada a acadar o principio real de Igualdade e avanzar na loita contra todo tipo de discriminación por razón de sexo.
Adán, despois de manifestar a súa condena a todo o retroceso que están a vivir as mulleres galegas no ámbito laboral, dereitos sociais, sexuais e reprodutivos, denunciou que en cinco anos as políticas sociais do Goberno galego pasaron a ser meramente residuais.
O día 8 de marzo coñeciamos os informes da Secretaría dos sindicatos sobre a situación das mulleres galegas: traballo vulnerábel, 132.000 desempregadas e 58.000 mozas galegas emigradas.
Diariamente, 32 mozas abandonan Galiza para buscar traballo fora
Neste sentido, abondou na realidade das mulleres máis novas obrigadas a abandonar Galiza na procura dun posto de traballo, cada día emigran 32 mozas en Galiza para facernos unha idea, dixo, é como se diariamente unha clase de instituto desaparecera.
Esta alarmante situación constata a inexistencia de políticas efectivas do Goberno Feijóo para impedir o éxodo masivo das mulleres mozas, o talento feminino emigra e os datos de desemprego incrementase é necesario abordar este grave problema e sobre todo, aportar alternativas.
Dende o BNG consideramos que non é o momento de falar en abstracto de demografía e maternidade tal e como está a facer o Partido popular cunha restritiva lexislación. Hai que abordar medidas concretas que favorezan a igualdade e a incorporación das mulleres ao mercado laboral, recalcou.
A lei do BNG incide en medidas para facilitar a incorporacións das mulleres ao mercado laboral e a independencia económica
Esta lei persegue tres obxectivos básicos: fomentar o coñecemento da corresponsabilidade e a importancia nas tarefas e coidado que competen a homes e mulleres, (tarefas do fogar nas que os homes empregan 40 minutos fronte as 4 horas das mulleres), medidas para facilitar a incorporación das mulleres ao mercado laboral a través de servizos públicos comunitarios, escolas infantís públicas e gratuítas de 0 a 3 anos, desenvolver a lei de dependencia dotándoa de máis prazas de día e residencia e, finalmente, obrigar á Xunta ao equipamento no ámbito da corresponsabilidade e negociación colectiva para non penalizar ás mulleres pola súa maternidade.
En crise económica a corresponsabilidade crea postos de traballo
A deputada asegurou que nun momento de crise, a corresponsabilidade crea emprego a través de políticas de incorporación das mulleres ao mercado laboral, agora é mais necesario que nunca, afirmou, denunciar o retroceso das mulleres que perden o posto de traballo por ter que coidar aos nenos e persoas maiores.
Adán rematou criticando o triunfalismo de Núñez Feijóo na celebración do 8 de Marzo, Día Internacional das mulleres, de maneira ritual e con grandes frases cando a realidade é que moitas mulleres galegas teñen graves dificultades para chegar a fin de mes e contar cunha praza de escola infantil para o seu fillo e filla.
