O deputado asegura que os datos da Enquisa de Poboación Activa, 296.900 persoas desempregadas en Galiza e a débeda pública constatan o fracaso das políticas do Partido popular
O portavoz do Grupo parlamentario do BNG, Francisco Jorquera cualificou hoxe de plublireportaxe a comparecencia, a petición propia, da conselleira de Facenda, Elena Muñoz para informar do obxectivo de estabilidade do ano 2013.
Jorquera iniciou a súa intervención lembrando os dados da Enquisa de Poboación Activa (EPA) da que dixo, confirman a taxa de paro do 23,2% con 296.900 persoas pero o déficit, do que vostedes presumen, parafraseando ao ex-secretario socialista, Pachi Vázquez, está niquelado.
Na comparativa interanual, Galiza 2ª comunidade onde máis medra o desemprego
O deputado criticou o triunfalismo da conselleira cando a realidade, dixo, confirma a existencia de 101.500 fogares galegos con todos os seus membros en paro pero o déficit está niquelado e non debemos preocuparnos, o control do déficit está feten e guai tanto, que pecharon o exercicio 2013 cun déficit inferior ao límite fixado nunha décima.
Vostedes falan con fachenda de rigor na xestión das contas públicas pero ese rigor conduce, como xa dixen o ano pasado, ao rigor mortis ao noso país. Dende o ano 2009 o paro medrou nun 70%, duplicouse o número de fogares con todos os seus membros e tamén se duplicou o número de fogares nos que xa non entra ningún ingreso, 120.000 en situación de pobreza severa e 650.000 galegos e galegas en situación de exclusión social, vostedes seguen negando o proceso destrutivo da base económica en Galiza.
A súa visión positiva da situación económica galega lévanos á ruína hipotecando o noso país, dende que vostedes gobernan, explicou, triplicaron a débeda pública, fixeron do equilibrio das contas o único obxectivo das súas políticas e fracasaron estrepitosamente.
Máis recortes á vista
Sobre o futuro, o nacionalista lembrou que o Goberno central ven de aprobar o programa de estabilidade 2014-2017 con máis de 3.000 millóns de novos recortes para as comunidades autónomas e vostedes aceitan sen rechistar mentres Cataluña e Andalucía xa anunciaron que recorrerán este reparto ante o Tribunal Supremo.
Van vostedes algunha vez a defender os intereses de Galiza reclamando unha reforma do sistema de financiamento? ou as súas propostas seguirán sendo slogans sen contido e submisión ao ditado de Montero.
O BNG, concluíu xa puxo enriba da mesa as súas propostas para recadar tributos dos que máis teñen e crear emprego, exerzan como Goberno e defendan os intereses galegos reiterou.
