Francisco Jorquera afirma que Feijóo recibiu unha moción de censura do pobo galego
O portavoz do grupo parlamentario do BNG, Francisco Jorquera manifestou que a multitudinaria manifestación de onte en Santiago de Compostela contra a Mina de Corcoesto e as novas explotacións mineiras, supuxo unha moción de censura a Núñez Feijóo e ao seu Goberno.
O parlamentario compareceu ante os medios de comunicación, acompañado da portavoz de industria do BNG, Carme Adán ao fin de presentar unha Proposición non de lei para pedir a retirada do Plan Sectorial de Actividades Extractivas de Galiza e consensuar cos axentes do Consello Galego de Minería un novo plan de ordenación desta actividade en Galiza.
Galiza non é a Mina do Partido popular
Adán e Jorquera retomaron o lema da multitudinaria manifestación celebrada onte en Santiago de Compostela, Galiza non é a mina do Partido popular e reclamaron outro modelo de produción baseado no coñecemento e contra as explotacións mineiras que benefician só aos especuladores e multinacionais e destrúen o noso territorio.
Os parlamentarios recalcaron que, o Goberno galego non cumpre a lei do ano 2008 do Consello Galego de Minería para desenvolver o Plan sectorial de explotación extractivas presentando o Plan ao informe medioambiental ser ter sido consencuado coas organizacións sindicais, colectivos en defensa da natureza e medio ambiente, organizacións de montes en mancomún e colexios profesionais.
Carme Adán manifestou que de non ser retirado o Plan, o BNG presentará alegacións para ordenar a minería contando coa cidadanía galega.
O PP quer abrir Galiza en canal para ceder os seus recursos a multinacionais baixo un modelo colonial
Pola súa parte, o portavoz do grupo parlamentario denunciou que o Partido popular pretende abrir en canal a Galiza para ceder os seus recursos a grandes multinacionais e aludiu ás 520 novas peticións de extraccións no territorio galego mesmo en zonas que afectan a biosfera.
Jorquera asegurou o proxecto de Corcoesto é incompatible cos aproveitamentos gandeiros, marisqueiros, forestais e turísticos da comarca de Bergantiños polo que reiterou a paralización da mina a ceo aberto así como o resto de peticións para novas actividades extractivas.
O deputado considerou que o modelo de Feijóo de claras características coloniais provocará a destrución de máis postos de traballo, os beneficios emigrarán e os custes serán internalizados convertendo en pan para hoxe e fame para mañá a extración de ouro en Galiza.
Ofensiva política parlamentar do BNG contra o modelo colonial e agresivo de Feijóo
O parlamentario apostou por un modelo de desenvolvemento sostible baseado no aproveitamento dos nosos recursos e nas potencialidades do noso país.
De non mudar o modelo de Feijóo, dixo, o BNG continuará cunha ofensiva política parlamentar para parar o proxecto de Corcoesto e os proxectos de megaminería.
Seguiremos insistindo, engadiu, nos puntos da Proposición non de lei defendida no último pleno para anular a Declaración de Impacto Medioambiental positiva para esta Mina, á vista de tres informes científicos que reflicten graves consecuencias para saúde humana por mor das grandes concentracións de arsénico na zona da Mina e volveremos a reclamar que sexan denegadas as novas explotacións e investigacións mineiras mentres non se dispoña dunha avaliación dos riscos.
Jorquera concluíu esixindo a inmediata retirada do Plan sectorial de Actividades extractivas de Galiza ao que a Xunta lle concedeu o carácter de Proxecto Industrial Estratéxico a pesar de aplicar un modelo que conleva a venda de Galiza por parcelas.
