O noso país recibe no período en vigor 2007-2013 5.600 millóns de euros en concepto de fondos estruturais e de cohesión, cantidade que, segundo os propios datos facilitados pola Xunta, se reducirá a 2.000 millóns de euros para o novo período 2014-2020, sen outra reacción por parte do Goberno de Feijóo que a mera complacencia.
A día de hoxe, Galiza perde 3.500 millóns de euros para cohesión nun momento de crise sen precedentes o que non impide ao Goberno de Núñez Feijóo manter un inaudito ton de triunfalismo diante dos embaixadores da UE facendo referencia a un suposto fondo de transición que non existe no documento aprobado polo Parlamento Europeo, nin na proposta da Comisión. O BNG pide ao presidente da Xunta que explique onde está previsto ese fondo de transición e cal é a súa dotación orzamentaria, alega a eurodeputada nacionalista, Ana Miranda.
Miranda explica que por primeira vez, deixamos de estar na categoría dos territorios menos desenvolvidas, polo que era previsible unha redución dos fondos estruturais para o periodo 2014-2020.
Pero a desidia e a ineficacia política da Xunta durante os dous anos de negociación, ten como consecuencia que unha caída previsible se convertese nun recorte drástico, que en lugar de reter 2/3 dos 5.600 millóns que recibe actualmente, como era a previsión inicial, se produza unha caída que deixa o orzamento en apenas 1/3 da cifra actual, explica a eurodeputada.
Neste sentido, Miranda considera que o presidente galego debe substituir o triunfalismo a ante os responsables da UE por alternativas reais para que, cando menos, Galiza conserve os 2/3 dos fondos de cohesión, o que suporía arredor de 3.500 millóns de euros para os próximos anos, 1.500 millóns de euros máis dos que ten asignados a día de hoxe, tras a pésima negociación da Xunta".
O BNG propón que se teña en conta a situación real da economía galega en termos de PIB. Non ten sentido que se tome como referencia o PIB de 2009, como sucede neste momento, para establecer o reparto duns fondos que entrarán en vigor en 2014. Dicir que o PIB de Galiza é do 91,3% e que estamos na categoría de rexións ricas non responde a situación real do noso país, polo que o BNG propón que se actualicen os datos de PIB rexional o que lle permitiría a Galiza pasar á categoría de rexións en transición e manter arredor do 66%, uns 3.500 millóns de euros, conclúe Miranda.