A portavoz do BNG no Congreso, Olaia Fernández Davila, presentou unha iniciativa parlamentar na Cámara para demandarlle á Ministra de Agricultura, Isabel García Tejerina, que utilice os novos informes científicos sobre o stock da xarda para que a pesca galega teña máis cupo de pesca de xarda.
Sinala Davila que o Goberno coñece ben o malestar xerado no sector pesqueiro de cerco galego pola distribución das cotas de pesca da xarda no litoral do estado, en concreto no Cantábrico Noroeste. A contrariedade dos mariñeiros galegos pola redución das cotas se explicitou en numerosas manifestacións e actos de protesta porque supuxo un duro revés para a frota de cerco dado que se trata dunha das pesquerías máis importantes.
Davila pón de manifesto que o sector pesqueiro de Galiza agarda agora que os malos augurios para a pesca desta especie que a UE estaba a barallar a finais do ano pasado se emenden, dadas as novidades que se recollen nos novos informes dos científicos que asesoran á UE.
Hai marxe para aumentar as cotas de xarda
A deputada do BNG advirte que o tempo corre e que aínda que até decembro non se decidirá na UE o Total de Admisíbeis de Capturas (TAC) para a xarda, non hai boas previsións sobre a mesa. Pero esa perspectiva se pode cambiar a raíz de coñecermos o informe realizado por científicos que asesoran á Comisión Europea. O Consello Internacional para a Explotación do Mar publicou unha nova recomendación sobre a poboación, o estado do recurso deste peláxico no Atlántico Nororiental, no que eleva a súa recomendación sobre cal debe ser o tope de capturas en relación ao que se barallaba en outubro de 2013.
A deputada nacionalista insta ao Goberno a traballar na UE para aumentar as cotas de xarda facendo valer os últimos informes científicos. Non cre o Goberno que existe marxe para aumentar as previsións iniciais? Que xestións vai realizar o Goberno ante a UE?.