Carme Adán cualifica de espectáculo lamentábel a viaxe a Madrid dos alcaldes do PP galego e cargos do Goberno de Galiza para pedir carga de traballo
A portavoz de Industria do BNG, Carme Adán cualificou hoxe, ante os medios de comunicación en sede parlamentar de lamentábel espectáculo o ofrecido polos alcaldes do PP galegos e cargos do Goberno galego desprazados en Madrid para reclamar carga de traballo.
Adán anunciou que o BNG, hoxe mesmo, remitiu ao Presidente da Xunta os balances dos diferentes centros de Navantia para evidenciar que se os estaleiros galegos non funcionan é porque o Presidente da Xunta non exerce como tal.
A deputada recriminou a postura pusilánime de Feijóo ante o Presidente do Goberno central do que dixo, aínda non vimos ningún aceno do mandatario galego ante Rajoy para resolver a dramática situación do Sector naval galego.
A parlamentaria explicou que Navantia reduciu a súa masa salarial nun 5,8% nos últimos 5 anos, mentres en Madrid aumentou a plantilla dos servizos administrativos un 25 por cento e Navantia conta con 63 millóns ao seu favor fronte os 300 de Cartaxena en negativo.
Neste sentido criticou que a pesar dos datos, o Consello de Ministros ofertara 700 millóns de euros para o submarino Cartaxena e cero euros para o dique flotante galego, é unha vergoña o espectáculo que está a dar no Partido popular, reiterou.
O BNG insta ao Presidente da Xunta a resolver co Presidente do Goberno central a falta de cargo de traballo no naval galego e deixe de utilizar a cortina de fume do veto de Europa para a construción do dique flotante en Ferrol porque, explicou, na cidade de Brest foi construído un dique flotante para reparacións navais utilizando fondos públicos e Feijóo tamén pode introducir nos orzamentos unha partida para o dique galego, concluíu.
