O BNG quere rematar coa “parálise” do termalismo en Ourense e denuncia que na actualidade hai menos termas operativas dende que Feijóo accedeu ao goberno hai 14 anos ao que sumou o sistemático incumprimento da lei do termalismo.
Neste sentido, a deputada nacionalista, Noa Presas anunciou que o BNG xa rexistrou diversas iniciativas para desbloquear esta parálise derivada, na súa opinión, da nefasta xestión política da Xunta “contraria ao modelo público” que xa existía en Ourense e por ter facilitado a alcaldía, en dúas ocasións, a unha persoa moi interesada en eliminar o termalismo.
Presas cualificou o proceder da Xunta de “demolición termal” como constata a creación dunha área termal en Ourense da que “nada se sabe”, agás “titulares e propaganda”. Ourense, recalcou a deputada, continúa “sen investimentos e instalacións”, sen acondicionar as existentes e cun modelo centrado exclusivamente no turismo.
A xuízo da deputada, “Ourense non pode renunciar ao termalismo porque conta cun gran potencial, xera riqueza e unha importante actividade económica.
As iniciativas rexistradas dixo, buscan desbloquear a parálise do termalismo a través do compromiso e colaboración das diversas administracións, a reforma da Lei de termalismo para que deixe de ser un obstáculo e a “compensación” a Ourense “pola desfeita destes anos”. Nesta liña, explicou que o BNG solicitará nos vindeiros orzamentos do ano 24 “un Plan económico de compensación para acometer todas as melloras que permitan a operatividade das instalacións termais” así como a creación de novos espazos e recursos.
