Ana Pontón acusou á Secretaría Xeral de Política Lingüística de terrorismo patronal e persecución ao profesorado CELGA
Os deputados do BNG, Ana Pontón e Cosme Pombo abandonaron hoxe a Comisión de Educación e Cultura na que estaba prevista a comparecencia, a petición propia, do secretario Xeral de Política Lingüística, Valentín García en protesta polos despedimentos dos profesores e profesoras dos cursos de ensino galego para adultos.
Ao inicio da comparecencia, a deputada do BNG anunciou que esta forza política se ausentaba da comisión como mostra de apoio e solidariedade co profesorado CELGA inxustamente despedido polo Secretario xeral de Política Lingüística, proceder que cualificou de terrorismo patronal e persecución intolerábel nun sistema democrático.
A nacionalista pediu a dimisión do Secretario xeral de Política Lingüística e esixiu a readmisión inmediata do profesorado despedido.
Antes de abandonar a sala, na que tiña lugar a comparecencia do titular de Política Lingüística para informar da das actividades de promoción e dinamización da lingua galega, os deputados colocaron nas cadeiras varios carteis cos lemas: Valentín dimisión e Readmisión dos despedidos CELGAS.
Tras a comparecencia de Valentín García, os deputados do BNG incorporáronse novamente a comisión ao fin de participar no resto dos debates incluídos na orde do día.
