O deputado do BNG, Manuel Lourenzo denunciou, a través dunha pregunta parlamentaria ao conselleiro de sanidade, Julio García Comesaña, a situación de “deterioro e caos” da sanidade pública no concello de Soutomaior.
Dende o escano, Lourenzo amosoulle ao titular de sanidade, varias imaxes de cartaces para constatar como a veciñanza debe agardar máis de 10 días nas lista de agarda para seren tratados e hoxe mesmo, dixo, no consultorio de Arcade despois de agardar semanas por unha cita deben dar a volta e pedir outra porque atopan un cartaz para informalos, “hoxe non hai médico”.
O nacionalista explicou que unha crianza en Arcade no caso de enfermar esta noite non terá pediatra ate o 16 de decembro e esta, recalcou, “é a realidade obxectiva” que vivimos en Soutomaior.
“Vostede pode vir aquí a facer o que fai sempre... a dicir que a culpa é do bipartito, do goberno central, que se as eleccións municipais pero a veciñanza de Soutomaior que padece esta situación xa non se cre máis mentiras. Porque eles viven esta desfeita”.
O deputado lembrou que o PP dixo que o peche do consultorio de Romariz sería temporal. E foi Mentira! Porque, “agora estamos sen consultorio en Romariz e sen médicos en Arcade”. O nacionalista continuou a súa intervención demostrando outras mentiras como a de que existen médicos suficientes pero os cupos, dixo, están “saturados” e os médicos marchan ante os colapsos cando falta un facultativo.
“É mentira” afirmou que non haxa médicos, o problema é que foxen da primaria ante as condición que vostedes lles impoñen e isto, non o di o BNG, isto díceo o Colexio oficial de Médicos de Pontevedra que rompeu relacións con vostede polas súas mentiras.
Tras a intervención do conselleiro de sanidade que negou a situación descrita polo nacionalista, o deputado nacionalista volveu a reclamar medidas para solucionar os problemas da sanidade no concello de Soutomaior e recalcou que o Partido popular continua na senda “de recortar” e levar a sanidade pública neste concello a unha “situación límite” polo que pediu “menos mentiras e máis médicos”.
