A deputada Ana Pontón defendeu unha Proposición non de lei para sumar ao Parlamento galego á denuncia presentada pola Mesa pola Normalización Lingüítica ante a ONU, contra a discriminación que sofre a lingua galega
Pleno.- El PPdeG rexeitou hoxe sumarse ao resto dos grupos parlamentarios para sacar adiante a declaración de denuncia, defendida polo BNG, contra a discriminación do galego e ás políticas de retroceso da Xunta en materia de normalización lingüística.
Ana Pontón, encargada de defender a proposta nacionalista, denunciou a cruzada do Partido popular contra o galego así como as medidas que a Xunta aplica para frear o proceso de normalización lingüística. Durante a súa intervención, a deputada lanzou un reto na Cámara galega , vivir un día enteiro en galego en Galiza aínda que avanzou que resultaría imposible.
Denuncia ante a ONU contra a discriminación do galego
A Proposición non de lei do BNG destinada a apoiar a iniciativa presentada pola Mesa pola Normalización Lingüística para denunciar ante a ONU a situación de discriminación da lingua galega foi rexeitada polo Grupo popular por considerar que conduce á confrontación social.
O portavoz do Grupo popular, Agustín Baamonde mostrouse contrario a proposta do BNG e asegurou que o PP defende as dúas linguas pero non quere monolingüísmos.
Neste sentido, a deputada censurou os tópicos e descalificacións de Bahamonde que segundo a nacionalista busca o chiste fácil e responde á carraxe e enfado que lles produce calquera cuestión relacionada coa política lingüística, aínda que lles moleste, manifestou Pontón, imos seguir defendendo a lingua e censurou as medidas do Partido popular contra o Plan de Normalización Lingüística votado e aprobado por unanimidade no Parlamento.
A deputada agradeceu o apoio de AGE e PSOE e reprobou que durante cinco anos, o Partido popular, subira ao cabalo dos que queren acabar coa nosa lingua.
A realidade que hoxe describimos xa foi denunciada pola Real Academia Galega, polo Consello da Cultura, por Asociacións do Ensino e polo Consello de Europa que censurou a política lingüística da Xunta porque vulnera a carta europea das linguas, dereitos humanos fundamentais.
Pontón parafraseando a Castelao afirmou que a moitos, non lles doe a lingua galega porque non se sinte no bandullo pero a nós dóenos que estea nun momento tan crítico cunha Xunta que segue pisoteando os dereitos de todos os galegos e galegas.
Vostedes son os únicos que defenden o monolingüísmo en castelán e cando hai unha discriminación para a lingua galega nunca está a voz do Partido popular para denúncialo, concluíu.