O Consello Nacional do BNG fixo balance e valoración dos resultados electorais do 25 de maio coa conclusión de que reflicten unha contestación á Europa das finanzas e a centralización do poder en Bruxelas, un incremento da presenza das forzas políticas nacionalistas que apostan por procesos soberanistas e un fondo rexeitamento da sociedade ás políticas de recortes da Troika.
O portavoz nacional, Xavier Vence, fixo unha lectura en positivo dos resultados nun contexto de dificultade aínda que insistiu en que non colma as aspiracións do Bloque que aspira a ser forza maioritaria que elabore alternativas pensadas desde Galiza e para Galiza.
Como lectura tras o proceso electoral, Vence salientou dúas ideas forza tras a reunión do Consello Nacional: galeguizar o debate político e abrir un diálogo franco e directo coa cidadanía rebelde e contestataria do país. Todo desde o convencemento de que Galiza precisa unha alternativa en clave galega e que o BNG pode e debe ser capaz de transmitirlle a esa cidadanía rebelde que ten na fronte nacionalista o seu aliado.
Temos que avanzar na galeguización do debate político porque as necesidades deste país son diferentes as de Madrid ou Catalunya, por exemplo. O son cando falamos de emigración ou de emprego, cando reivindicamos unha banca propia ou cando queremos romper coa centralización. Precisamos que as alternativas se formulen en clave galega e con forzas políticas propias, explica.
En canto a segunda cuestión, Vence foi claro ao anunciar que o BNG quere abrir un diálogo franco coa cidadanía rebelde, con todos os sectores sociais que teñen ánimo de rebelión e contestación para reforzar a necesaria alternativa nacional de esquerdas que precisa este país, argumentou.
O Bloque vai por mans a obra de inmediato con eses obxectivos, comenzando pola realización de asembleas locais e comarcais abertas que concluirá con novas propostas para trasladar ao conxunto da sociedade.
Porque o BNG está convencido de que comparte aspiracións con moito do electorado que o 25M elixiu outras alternativas, co electorado que rexeita á Troika, as políticas de recortes da dereita e que rexeita a corrupción que impregna aos partidos sistémicos.
O BNG quere dirixirse a ese electorado que comparte as mesmas aspiracións e ser o seu referente fundamental en clave galega, insistiu Vence, quen quixo deixar claro que non se trata de facer diálogos por riba entre siglas senón socializar ese diálogo e abrir pontes. Queremos ampliar a base social do nacionalismo con todos os que teñan Galiza como referente, concluíu.