A portavoz do BNG no Congreso, Olaia Fernández Davila, e a deputada do BNG, Rosana Pérez, manifestaron no pleno monográfico do Congreso o respaldo do BNG á lexítima demanda do pobo catalá de celebrar un referendo e poder decidir libremente o futuro da súa nación.
A Cámara Baixa celebrou unha sesión plenaria especial para debater e votar a proposición de lei do Parlament catalán de delegación na Generalitat da competencia para autorizar, convocar e celebrar un referendo sobre o futuro político de Catalunya.
A portavoz do BNG fixo unha breve intervención para deixar claro o rotundo apoio do BNG ás lexítimas aspiracións do pobo catalán. Negar a realidade por moito que se insista nelo, non fai que desapareza, dixo dirixíndose ás bancadas do PP e do PSOE.
Davila afirmou que o feito nacional que representan Galiza, Euskadi e Catalunya son un exemplo porque constitúen unha nación, unha realidade que se manifesta permanentemente, e a súa negación só leva a reafirmar o sentimento de identidade como así o expresa o pobo catalán.
Non obstaculicen o dereito a manifestarse nas urnas
A deputada do BNG demandou respecto para unha proposta de lei que que reflexa a vontade da sociedade catalá de decidir sobre o seu futuro. É unha proposta democrática que conta co apoio maioritario dos representantes do Parlament. Unha proposta democrática que debería ter nestas Cortes Xerais unha resposta democrática.
A portavoz do BNG dirixiuse ao PP para advertirlle que non sigan escudándose no argumento de que o proceso non está amparado pola lei, porque quedou demostrado que depende de quen a interprete, e as leis non son inmutábeis, poden ser modificadas para adaptalas á realidade e á evolución dos tempos onde se deben aplicar.
Teñan presente que os tempos actuais non son os tempos de hai corenta anos.
Reprochou ao PP e ao PSOE que veñan dicer que están dispostos a un diálogo democrático e ao recoñecemento das singularidades, pero deixando claro que o que se acorde debe estar suxeito ao que vostedes queren. Finalizou exhortando ao bipartidismo a non obstaculizar o dereito a manifestar con liberdade as diferenzas nas urnas, non teñan medo a aceitar o que outros, através do seu voto, desexan para o seu futuro.
