O BNG, a través da súa senadora Carme da Silva, consegue sacar adiante unha moción para instar o Goberno a impulsar e axilizar as infraestruturas ferroviarias na Galiza. Entre outras cuestións, a organización nacionalista logra o apoio necesario para demandar ao executivo a axilización para a implantación das cercanías, acelerar a conexión entre Lugo e Santiago, completar o Eixo Atlántico desde o norte -Ferrol- até o sur -coa fronteira portuguesa-, promover a modernización da liña A Coruña-Lugo e asegurar que a alta velocidade chegue a Lugo e Ferrol.
“A moción do BNG pon sobre a mesa as principais necesidades ferroviarias da Galiza en transporte ferroviario. Pon o foco na mobilidade e no tránsito diario para que os galegos conten co tren, sendo este o transporte que nos sitúa na primeira fila da mobilidade sustentábel e na loita contra o cambio climático” sinala a senadora do BNG.
Após coñecer o resultado da votación, Carme da Silva asegurou o compromiso da súa organización coa cidadanía galega que, tal e como quedou demostrado no Acordo de Investidura conseguido, a súa función é ser útiles para os galegos e galegas: “o impulso das infraestruturas ferroviarias non virá da dereita nin de ningún partido estatal, virá como froito do traballo incansábel do BNG defendendo os intereses da Galiza” asevera.
“Axilizar os estudos e os trámites en marcha para a implantación dos servizos ferroviarios de cercanías en Galiza, comezando polos eixos A Coruña-Ferrol e Vigo-Pontevedra” recolle o primeiro punto aprobado na moción do BNG presentada e defendida por Carme da Silva. Unha infraestrutura e un servizo do que aínda carece a Galiza, a pesar de existir masa crítica suficiente, que está recollido no Acordo de Investidura asinado polo BNG e que “precisa de máis celeridade para polo en marcha”.
A iniciativa aprobada recolle a necesidade de acabar co Eixo Atlántico co obxectivo vertebrar a Galiza de norte a sur, sen esquecer a Ferrol “e achegándonos a Portugal coa construción da saída sur de Vigo no horizonte de 2030”. Unha moción que demanda completar o Arco Atlántico, Lisboa-Porto-Vigo-A Coruña-Ferrol, en sintonía co Goberno portugués, executando os tramos de forma coordinada para poder chegar xuntos á fronteira portuguesa.
“Para o BNG é de xustiza rematar co déficit de Lugo en materia de infraestruturas ferroviarias e non quede atrás. Unha moción que non se esquece de Lugo e as súas necesidades e recolle unha conexión áxil con Santiago e mellorando a súa conexión coa Coruña para poder ofrecer tempos competitivos que permitan non coller o vehículo privado” subliña a senadora do BNG.
Así mesmo, a iniciativa do BNG aprobada exixe axilizar o baipáss de Betanzos e a mellora da liña de ferrocarril entre Ferrol e A Coruña posto que estamos a falar dunha infraestrutura, a actual, obsoleta e propia doutros tempos.
Respectar os acordos unánimes do Parlamento de Galiza
A senadora nacionalista aceptou engadir un novo punto na resolución da moción “respectando os acordos unánimes da cámara galega” e instar o Goberno a garantir o acceso das cidades de Lugo e Ferrol á alta velocidades en condicións de igualdade co resto do territorio. Mágoa, sinalou Carme da Silva, que o Partido Popular “ademais de non respectar nin aceptar os acordos unánimes no Parlamento Galego nesta cámara, vote unha cousa en Madrid e outra diferente na Galiza en moitas ocasións”.
