A deputada indicou que sindicatos, propietarios forestais e organización profesionais amosaron a súa oposición ao modelo de brigadas municipais pola súa ineficacia e ineficiencia
Tereixa Paz reclamou hoxe, a través dunha Proposición non de lei, realizar un exhaustivo seguimento do proceso de contratacións, nos concellos, para as brigadas municipais de prevención e defensa contra os incendios.
Na súa intervención, a nacionalista alertou do inicio do período de temporada alta de aparición de incendios e lembrou que hai quince días xa se produciu un episodio que mesmo obrigou á consellería a prohibir todas as queimas.
A parlamentaria denuncio que a día de hoxe, non foi iniciado o despregamento do dispositivo adicional de incendios forestais para a campaña 2014, e máis, engadiu, os compromisos asumidos pola titular da consellería, en sede parlamentar, sobre a reposición de efectivos nas brigadas fixas descontinuas da Xunta, prazas contempladas nas RPTs e orzamentadas, aínda non se efectivizaron.
A nacionalista cualificou de aberrante que a Xunta non transferira a partida para o mantemento dos grupos de emerxencias supramunicipais, circunstancia que obriga aos concellos a asumir a súa viabilidade. Por outra parte, salientou que os alcaldes néganse a que estes grupos actúen fora do termino municipal.
Sobre a contratación de persoal, a parlamentaria do BNG asegurou que moitas das brigadas non contan con persoal suficientemente formado nin en condicións adecuadas para desenvolver o seu traballo polo que pediu cumprir a lei sobre nesta materia para respectar a capacidade, mérito e igualdade na contratación.
A Xunta deriva a responsabilidade aos concellos e estes, subcontratan con empresas. O resultado na temporada pasada foi de caos e deuse mesmo o caso de producirse un incendio ao que no acudiu a brigada por estar limpando o campo da festa por orde do alcalde de turno, por certo, do Partido popular.
Se a climatoloxía deixa de acompañarnos, o risco de incendios é moi alto ao que temos que sumar a ausencia de operatividade dos dispositivos, concluíu.
A Proposición non de lei defendida por Tereixa Paz foi rexeitada polo grupo maioritario do Partido popular.
