A deputada do BNG no Congreso, Rosana Pérez, afirmou hoxe en rolda de prensa conxunta con ERC e Amaiur que Rajoy acudirá mañá a comparecer tarde, mal e arrastro e obrigado pola presión social e política.
Rosana Pérez engadiu que non cremos que Rajoy vaia aportar nada novidoso mañá, e moito menos que vaia falar con claridade en relación á corrupción e o financiamento ilegal do PP. É ineludíbel que o Presidente do Goberno español dea a cara, deixe de agocharse e dea explicacións. A deputada do BNG sinalou que a corrupción e o financiamento ilegal do PP non é algo novo, é consecuencia do esgotamento dun sistema derivado do bipartidismo, o sistema da alternancia de partidos.
A parlamentar nacionalista comezou a conferencia de prensa no Congreso con ERC e Amaiur, expresando as condolencias do BNG ás familias das vítimas do sinistro de tren en Galiza.Deu os parabéns aos efectivos de servizos públicos porque nunha catástrofe como a vivida se demostrou a importanza dos servizos públicos, tanto do eido sanitario como das emerxencias. Agradeceu aos veciños de Angrois o seu comportamento porque sen a súa axuda a traxedia tería sido pior.
Recentralización do Estado
Rosana Pérez salientou o enorme retroceso democrático que se produciu no último ano e medio, unha importante regresión nos dereitos individuais e colectivos. A comparecencia de Rajoy é necesaria por hixiene democrática pero non vai servir para solucionar os graves problemas que sofre o Estado español, problemas de fondo. Un deles a negación dos dereitos das nacións do Estado, en alusión a Galiza, Catalunya e Euskadi.
A parlamentar nacionalista criticou a recentralización de competencias que está a realizar o PP e o aproveitamento de Reais Decretos para restar competencias autonómicas. Nesa liña, fixo especial mención á LOMCE e ao proxecto de Reforma da Administración Local, que só pretende manter a estructura centralista como son as deputacións e quitar competencias aos concellos.
Rosana Pérez enfatizou a necesidade de avanzar cara unha verdadeira democracia: O estado español precisa unha auténtica democracia, que incremente a participación cidadán, e como forza nacionalista consideramos imprescindíbel que haxa un recoñecemento das nacións do estado, un recoñecemento dos seus dereitos políticos.