Cosme Pombo defendeu retirar a Lei orgánica de Mellora da Calidade Educativa (LOMCE) que prima o ensino privado, invade competencias galegas e recorta dereitos laborais do profesorado
O portavoz de educación do BNG, Cosme Pombo defendeu hoxe, en comisión parlamentaria, unha Proposición non de Lei que reclamaba do Goberno central a retirada da LOMCE, proposta que contou co apoio do PsdeG e AGE e rexeitada polo Partido popular.
Na súa intervención, o parlamentario do BNG afirmou que a Lei Wert xa coñecida como a Lei da Wertgoña pretende privatizar, desgaleguizar e recentralizar o sistema educativo e repudiando a forma plurinacional, pluricultural e plurilingüística do Estado español.
O nacionalista indicou que esta contrarreforma basease en criterios mercantilistas, elitistas e antisocias conduce ao alumnado ao abandono ou fracaso escolar daqueles que teñen menos recursos.
A Lei potencia os centros de ensino privado
Para o deputado do BNG, a Lei Wert supón legalizar a concertación con centros privados que separan ao alumnado por razón de xénero e rebaixará a capacidade de establecer currículos, polo tanto, máis discriminación social e un ataque aos principios elementais da educación, afirmou.
O parlamentario lamentou que o PP rexeitara a iniciativa do BNG e acusou ao Goberno galego de actuar como delegado do Ministerio e non como a máxima autoridade para defender e velar polas competencias en materia educativa e garantir para que o alumnado galego remate os estudos en total competencia na lingua galega.
Cosme Pombo afirmou que a nova Lei Wert converte o ensino nunha carreira de obstáculos para o alumnado, repudia a realidade social, cultura e lingua galega e pretende crear mediante programas de calidade e especialización curricular diferentes categorías de centros atendendo con máis recursos os que mellores resultados acaden, previa selección do alumnado e que corresponderán aos centros privados.
O deputado concluíu asegurando que a comunidade educativa, que mañá secundará a folga e partipará na manifestación, votaría a favor da retirada da Lei Wertgoña.
