A deputada do BNG, Montse Prado reclamou, a través dunha Proposición non de lei, non pechar 1.200 camas hospitalarias nos meses de verán e contratar persoal para evitar a medida
A deputada do BNG, Montse Prado reclamou hoxe, na Comisión de Sanidade, non pechar as camas hospitalarias durante os meses de verán para impedir colapsos nos servizos de urxencias e o aumento das listas de espera.
Prado insistiu nas consecuencias do peche de camas hospitalarias destacando a saturación nos corredores e a desorganización na atención de enfermos e crónicos, o PP empeñase en deteriorar a sanidade e esta medida incide gravemente nesa dirección, manifestou.
Apoio do BNG aos traballadores e traballadoras da sanidade
A nacionalista principiou a súa intervención expresando o apoio do BNG aos traballadores/as e centrais sindicais que hoxe e o pasado día catorce convocaron mobilizacións contra a privatización do sistema sanitario demandando restituír o carácter, público, gratuíto e universal da sanidade galega.
As protestas do persoal deitado no chan dos hospitais, dixo, continuarán o vindeiro día 28 para denunciar o actual deterioro da sanidade, un deterioro, consolidado polo Partido popular, día tras día.
Xa no debate, a deputada reiterou que a Xunta dedica os seus esforzos a privatizar os diferentes servizos sanitarios, loxísticos, e tecnoloxía como evidencia a redución dos orzamentos anuais ao que hai que sumar a escusa do aforro coa aplicación de copagamentos por prestacións sanitarios que non son máis, dixo, que impostos á enfermidade
Neste contexto, engadiu, a Xunta da unha volta de torca e no período estival procederá ao maior peche de camas hospitalarias da nosa historia. A partir do mes de xuño, comezará a medida que alcanzará a cifra, durante os catro meses de verán de 1.200 camas co conseguinte problema asistencial e presión sobre o persoal sanitario e centros ao verse obrigados a reducir os ingresos e tempos de estancia.
PP: Pechamos camas para que o persoal disfrute das vacacións
Pola súa parte, o portavoz popular Aurelio Alfonso Núñez Centeno xustificou a medida argumentando que o persoal da sanidade debe disfrutar das vacacións e resulta imposible substituílo, de aí que haxa que pechar as camas no verán.
A parlamentaria respondeu que a única intención do PP non é outra máis que seguir cos recortes e se non hai actividade, non hai gasto para logo presumir dos cartos aforrados grazas as medidas de austeridade.
Fronte o rexeitamento social e d@s profesionais contra o peche de camas, agora o PP sorpréndenos co Hospital na casa argumentando que o elemento cama ofrece pouco valor e resulta moi caro, segundo afirmou a conselleira de Sanidade e o propio Presidente da Xunta. Grazas a este invento, serán derivados aos domicilios doentes oncolóxicos, respiratorios ou con obstrucións pulmonares, hai que ter valor para propoñer semellante barbaridade, concluíu a nacionalista
A iniciativa do BNG destinada a non pechar as camas hospitalarias contou co apoio do PSOE e AGE pero finalmente foi rexeitada polo grupo maioritario do Partido popular.
