Tereixa Paz censura a negativa do grupo conservador a solicitar documentación da Xunta sobre contratos e subvencións para seren analizados na comisión
A aprobación do plan de traballo da comisión para a elaboración de medidas de prevención e erradicación da corrupción política iniciada hoxe no Parlamento galego, só contou cos votos favorables do Partido Popular, tras un fallido intento da oposición para incorporar máis comparecencias e documentación da Xunta sobre contratos, adxudicacións e subvencións.
A deputada do BNG, Tereixa Paz considerou que a proposta de traballo da mesa da Comisión resultaba insuficiente ao impedir a comparecencia dos membros do Goberno galego, incluído o Presidente da Xunta, representantes do ámbito xudicial galego, sindical e cidadá polo que pediu unha rectificación para ampliar as comparecencias, solicitude que foi denegada polo grupo maioritario do Partido popular.
Paz criticou que o portavoz do PP afirmara que a corrupción era unha actitude persoal ao que a nacionalista respondeu que a primeira preocupación da cidadanía é a corrupción política aínda que o PP sega negando esta realidade.
Parece, engadiu, que a intención do Partido popular é preservar aos corruptores nesta comisión e tamén a eses intereses económicos e empresariais que acaban sendo favorecidos pola corrupción.
Veto a organizacións sindicais, Axencia tributaria e cidadanía
Na súa intervención, a deputada Tereixa Paz censurou a falta de vontade do PP para afondar nas verdadeiras causas da corrupción, estamos, dixo, a falar de evasión e fraude fiscal, de negocios fraudulentos, acordos ilícitos entre compañías, de privatización dos servizos públicos, arbitrariedade no funcionamento da administración, escuras relacións entre a política e a empresa coa famosa porta de atrás que permite que políticos no exercicio do seu cargo tomen decisións sobre empresas nas que acaban sendo directivos.
A parlamentaria nacionalista estendeu a corrupción ao propio sistema e a procesos de perversión democrática que lle dan carta de natureza legal á comercialización de preferentes e subordinadas, casos, dos que son vítimas o conxunto do pobo a mans de multinacionais financeiras.
O PP rexeita o plan de traballo do BNG
Tereixa Paz manifestou que corrupción tamén é incumprir os compromisos electorais e financiar ilegalmente os partidos. O grupo parlamentar nacionalista, engadiu, presentou un plan de traballo para abordar, a través das comparecencias e documentación, a contratación pública, subvencións, privatización de servizos e ben nas empresas públicas, o acceso á función pública, campañas electorais, decisións en urbanismo e as tramas de corrupción radicadas en Galiza como as Operacións Pokemon, Gürtell e Campión.
Tras uns minutos para negociar un novo plan de traballo, Tereixa Paz criticou que o Partido popular mantivera a súa intención de non aceptar ningunha modificación como solicitaba a oposición, isto é unha tomadura de pelo e un paripé e dende o BNG, anunciou, votaremos en contra porque vetan vostedes as organizacións sindicais e aos axentes que poden aportar importante información sobre o que imos analizar.
Paz mostrouse especialmente molesta ante a negativa do Partido popular a aportar documentación da Xunta ao fin de ser analizada pola comisión, o Partido popular, reiterou, converte o Parlamento na súa leira impedindo que saían a luz os casos de corrupción na administración pública.
