A portavoz nacional, Ana Pontón, reclamou ao presidente da Xunta, Alfonso Rueda, que remate coas “discriminacións e os agravios” con Carballo e acometa dunha vez por todas os investimentos e as infraestruturas pendentes dende hai anos no concello.
Así llo reclamou ao titular do Executivo logo da visita que realizou, acompañada polo alcalde Evencio Ferrero e integrantes do grupo municipal de goberno, ás instalacións da empresa Herfraga, firma dedicada á fabricación e exportación de maquinaria para o sector da conserva da que destacou o seu carácter innovador e na que exemplificou a capacidade produtiva e exportadora que ten Galiza.
Unha capacidade que en Carballo, advertiu, está sendo limitada polo Goberno do PP, que mantén paralizados proxectos estratéxicos para o municipio e para o conxunto da comarca, converténdose “nun tapón á hora de crear emprego e riqueza e de xerar máis dinamismo económico”.
Pontón exemplificou a discriminación da Xunta con Carballo no polígono de Bértoa, no que está localizada precisamente Herfraga, un polígono industrial que, a día de hoxe, non dispón do solo que precisa porque o Executivo do PP ten paralizada a súa ampliación dende hai 16 anos.
Neste sentido, recordou que en 2009 había unha partida orzamentaria que xa estaba consignada para ampliar o polígono pero que foi detida coa chegada dos populares ao poder, o que supuxo paralizar o aumento de solo empresarial e, polo tanto, “lastrar as posibilidades de crecemento e dinamismo económico”.
“Pedímoslle á Xunta e ao señor Rueda que non fagan de tapón no desenvolvemento económico e industrial, que non freen a creación de emprego nesta comarca e que se execute dunha vez un polígono industrial que é necesario e que están reclamando tanto o concello como os empresarios e empresarias”, reclamou.
Pontón considerou incomprensible que o Goberno do PP “non estea á altura do que necesita Carballo para poder seguir medrando”, un concello que é ademais unha “zona estratéxica no desenvolvemento económico de Galiza”.
Mais, lonxe de limitar o seu agravio ao municipio neste polígono, a portavoz nacional recordou tamén outras discriminacións como a da circunvalación da localidade, unha infraestrutura que tamén leva anos paralizada e que resulta fundamental non só para mellorara a mobilidade e a seguridade viaria, senón tamén para incrementar a competitividade empresarial no conxunto da comarca de Bergantiños.
A líder nacionalista incluíu tamén na “lista de agravios e de discriminacións con Carballo”, a negativa da Xunta a liberar de peaxes a AG-55, cando si rescata outras autoestradas de titularidade autonómica, permitindo deste xeito que os veciños e veciñas do concello e da comarca “teñan que seguir pagando unhas peaxes que son inxustas”.
Diante do incumprimento das “obrigas con Carballo” do Goberno do PP, Pontón indicou que o BNG vai seguir levando distintas iniciativas ao Parlamento galego para que “se faga realidade” o que o municipio necesita para seguir medrando e desenvolvéndose economicamente.
“O que non é de recibo é que o goberno do Partido Popular estea discriminando e agraviando aos veciños e veciñas de Carballo e de todo Bergantiños sen facer os investimentos aos que, por certo se comprometeu”, denunciou, parar ironizar a continuación sobre o feito de que o PP só se acorda da cidadanía deste concello e da comarca en campaña electoral.
“Só se acordan destes investimentos en campaña pero, á hora da verdade, seguen sendo sempre proxectos pendentes e nós queremos que Carballo avance, polo que levaremos ao Parlamento todos estes temas”, concluíu.
Solicitude de pleno extraordinario no Parlamento sobre a quita da débeda
Por outra parte e en relación ao debate sobre a condonación da débeda, Pontón avanzou que o BNG solicitará a convocatoria dun pleno urxente extraordinario para que o presidente da Xunta explique por que vai traizoar a Galiza rexeitando a quita de 4.000 millóns de euros negociada polo BNG no acordo de investidura.
“Ningún galego ou galega entende como é posible que, podendo reducir a débeda de Galiza nun 33%, o señor Rueda diga non, única e exclusivamente porque llo manda o señor Feijóo desde Madrid”, criticou Pontón, quen cualificou a posición do titular da Xunta como “unha traizón a Galiza” que debe ser explicada en sede parlamentaria.
Por iso, a líder nacionalista pediu a Rueda que “non sexa covarde” e acuda á Cámara a dar explicacións dunha actitude que só reflicte que, recalcou, “temos ao Goberno máis irresponsable e tamén ao máis antigalego da historia” e que traballa “en conta dos intereses de Galiza, única e exclusivamente para seguir as directrices que lle mandan desde a rúa Génova”.
Neste sentido, recordou que o BNG “xa fixo o traballo difícil, que era negociar unha quita da débeda de 4.000 millóns, o 33% da débeda de Galiza” e o PP só “ten que facer o traballo fácil, que é aceptala”.
Pontón insistiu en que a posición do PP é unha “irresponsabilidade e un sen sentido” e “vai en contra dos intereses” de Galiza e subliñou que o titular da Xunta “non pode seguir coa camiseta do Partido Popular”. “Ten que poñerse a traballar para defender os intereses dos galegos e das galegas, que son os que lle pagan o seu salario”, engadiu.
“Necesitamos un presidente que non instrumentalice a Xunta para seguir o ditado da estratexia do Partido Popular desde Madrid”, advertiu, para concluír a continuación que a postura do PP non só representa “un absoluto desprezo á cidadanía deste País”, senón que, “o máis grave, lle fai perder 4.000 millóns de euros”.
