A portavoz parlamentaria acusa ao Presidente da Xunta de protagonizar un dos períodos máis negros da historia democrática galega e deixar a Galiza en recesión.
Ana Pontón acusou hoxe ao Presidente da Xunta, Alberto Núñez Feijoo de deixar a Galiza con máis paro, menos servizos públicos, máis persoas sen ingresos e os sectores produtivos nunha situación límite.
Na comparecencia ante os medios de comunicación para avaliar a xestión do Goberno galego, tralo anuncio do adianto eleitoral, a nacionalista afirmou que a solvencia dun goberno non se mide no déficit , mídese na capacidade de xerar emprego, riqueza e benestar, e dixo, queFeijoo fracasou e permanece instalado nun triunfalismo estéril.
A solvencia dun Goberno non se mide no déficit , mídese na capacidade de xerar emprego, riqueza e benestar
Pontón referiuse á economía galega da que destacou a súa situación crítica no agro, na pesca e o naval, xa van tres trimestres de descenso e acusou ao Núñez Feijoo de ser incapaz de facer fronte á crise económica, moi polo contrario, afirmou tomou decisións que agravaron a situación.
Neste sentido, para a deputada, o Presidente da Xunta aceptou un sistema de financiamento inxusto e discriminatorio , paralizou o concurso eólico, coa perda de miles de empregos e foi cómplice da desaparición das caixas galegas como único instrumento financeiro propio.
Feijoo foi cómplice da desaparición das caixas galegas e impediu que foran investigadas
Pontón criticou que a pesar das promesas para investigar o acontecido nas caixas galegas, o Partido popular actuou de tapón para impedir que os galegos e galegas souberan a verdade.
Tres anos e medio de incumprimentos
A nacionalista tamén asegurou que Feijoo incumpriu as súas promesas electorais, unha a unha, como a de iniciar a recuperación económica e crear emprego, porque en realidade, dixo estamos en recesión.
Prometeu blindar os servizos públicos, hoxe temos menos profesores, máis listas de espera e Galiza está a cola en atención á dependencia, engadiu.
Para Pontón, Núñez Feijoo instalou un neocaciquismo co control férreo dos medios públicos de comunicación, convertendo ao Parlamento galego nun apéndice do Goberno e do PP.
Ataques á cultura e lingua galega
No balance da xestión política do Goberno dirixido por Núñez Feijoo, a nacionalista afirmou que por primeira vez na Historia da autonomía, un goberno prohibe o uso do galego en varias materias do ensino e mentres a nosa cultura esmorecía, a Xunta destinaba miles de millóns ao Gaiás, un proxecto, que naceu fracaso e que nesta lexislatura demostrou o seu sinsentido.
O BNG á altura das circunstancias
Ante esta realidade, manifestou o BNG estivo ao lado do pobo, activo no Parlamento e coa sociedade.
Pontón reiterou que a lexislatura, que agora remata, pasará á historia como un dos períodos máis negros da etapa democrática onde os recortes das liberdades, a destrución do tecido produtivo e o deterioro das condicións de vida dos traballadores e traballadoras, dos autónomos e sociedade galega en xeral, forman o groso do balance do Goberno presidido por Alberto Núñez Feijoo.
http://youtu.be/ujXqtTxHa2o