A deputada afirma que o PP mantén en punto morto, por período inhábil, as comisións de investigación da venda de Novagalicia Banco e corrupción para ocultar a súa implicación e responsabilidade
A viceportavoz do BNG, Ana Pontón compareceu ante os medios de comunicación, tras a xunta de portavoces na que se decidiu a convocatoria da comisión de estudo da futura lei de Solo durante o mes de xaneiro, convocatoria dixo, que pon de manifesto o absurdo da mesma ao non ser período hábil no Parlamento.
Neste sentido, Pontón puxo o acento no punto morto no que se atopan importantes comisións como a de investigación das Caixas e a da corrupción. Para a deputada, esta situación responde á intención do Partido popular de ocultar a súa responsabilidade no fiasco e desastre da privatización e venda de Novagalicia Banco.
O PP négase a debater no Parlamento os casos de corrupción
Asemade, insistiu, o PP tampouco está disposto a tratar en profundidade todas aquelas cuestións relacionadas coa corrupción.
Neste sentido, e respondendo preguntas dos xornalistas sobre a imputación da deputada popular, María Dolores Faraldo por prevaricación e falsidade documental na súa etapa como alcaldesa de Betanzos, a nacionalista afirmou que debe dimitir como fixeron outros deputados e deputadas doutros grupos pero lamentablemente comprobamos como a ética e o respecto polos mínimos principios morais non son aplicados polo Partido popular, a case totalidade da corporación municipal do PP en Santiago está imputada así como os concelleiros imputados na Costa da Morte e a directora de urbanismo. O grave, manifestou, é que Núñez Feijóo da acubillo a este tipo de prácticas.
Reducir escanos no Parlamento é reducir a democracia
Sobre a redución de deputados/as, Pontón cualificou a Núñez Feijóo de galego renegado e galego que traizoa os intereses de Galiza, porque a súa única preocupación é ser útil a estratexia centralista do Partido popular.
Para a deputada a reforma do Parlamento galego é unha involución á que se debe facer fronte porque recorta o autogoberno e impide que todos os galegos e galegos teñan o mesmo peso e decisión, sexa cal sexa o seu lugar de residencia.
Os copagos non son económicos, son ideolóxicos
Ante a renuncia da ministra Mato a aplicar o copago sanitario a ambulancias e próteses, Ana Pontón considerou que o anuncio responde á mobilización de organizacións sociais, políticas e sindicais contra os recortes.
En opinión da deputada, a aplicación do copago constata que non respondía a criterios de aforro e esta marcha a trás é un triunfo da presión social e a constatación de que Núñez Feijóo respondeu como fiel escudeiro das medidas do Goberno central.
Finalmente, Pontón considerou que toda a política de recortes debe ser revisada porque pon en perigo a saúde das persoas.
