A deputada do BNG, reprochou ao Partido popular que os agricultores só reciban o 3% das axudas cando Galiza representa o 9% das explotacións do Estado
A deputada do BNG, Tereixa Paz formulou hoxe unha pregunta parlamentaria sobre as negociacións da PAC e o impacto dos acordos para Galiza.
Na súa intervención, a parlamentaria criticou o triunfalismo do Partido popular nunhas negociacións nas que Galiza perde 300 millóns de euros para políticas de desenvolvemento rural no período 2014-2020.
A parlamentaria insistiu en que a Xunta non defendeu o sector agrario galego e froito dese desleixo, os agricultores/as de Galiza percibirán só o 3% das axudas a pesar de representar o 9% das explotacións do Estado.
Para Tereixa Paz, o Goberno galego tampouco defendeu o sector lácteo ao aceptar o criterio para repartir as axudas do fondo lácteo que prexudica gravemente ao sector galego por priorizar o número de cabezas de gando por explotación.
Contrariamente a este criterio, o BNG defendeu ter en conta o número de postos de traballo xerados, a base territorial e o mantemento da actividade no medio rural.
Tereixa Paz lamentou o papel do Partido popular nas negociacións, vostedes, dixo, non se mantiveron firmes para defender Galiza, foron a parabenizar a Arias Cañete a pesar de que o ministro só beneficia ás grandes áreas cerealistas e aos terratenentes do Estado. Concluíu.
