O deputado do BNG, Xosé Luís Rivas (Mini), preguntou hoxe ao goberno polas medidas previstas contra os danos en explotacións agrarias, propiedades e estradas ocasionados polos ataques do porco bravo en Galiza.
Na súa intervención, cualificou de “insuficientes” as axudas e acusou a Medio Rural de non responder ás chamadas das persoas afectadas por ataques desta especie. O campo parece que “non pinta nada” para a consellería, apostilou.
MEDIO RURAL RECOÑECE QUE AS AXUDAS NON TIVERON DIFUSIÓN
Pola súa parte, a directora de Medio Rural, Ana María Díaz coincidiu co nacionalista no grave problema que representa o porco bravo en Galiza e confirmou que a Xunta segue estudando posibles alternativas. Díaz afirmou que non existen moitos expertos para elaborar estudos ao que o parlamentario replicou que a información coa que conta o BNG é o resultado dos traballos de persoas expertas o que levou a directora xeral a solicitar a colaboración dos expertos cos que conta o BNG para abordar novas medidas. Díaz tamén recoñeceu que a orde de axudas do 2016, “non foi suficientemente difundida”.
O deputado do BNG insistiu en que “o abandono do rural” incrementa o problema porque, ao seu entender, o porco bravo ante a ausencia humana “vive as súas anchas”. Por outra parte, a abundancia de comida e refuxio tamén incide ao igual que a grande procreación das femias. Os agricultores e gandeiros reclaman batidas pero a solución non pasa só pola “escopeta e o lazo” aínda que as batidas sexan necesarias, sen embargo, dixo, mentres non exista un censo da poboación desta especie e estudos do seu comportamento non contaremos coas alternativas necesarias.
O deputado lembrou que as queixas das persoas afectadas polos ataques do porco bravo na súa maioría, refírense ao desleixo de Medio Rural, porque “chamas e non veñen” e non “collen o teléfono”, afirmou Rivas.
En canto ao grupo de traballo da consellería e falta de expertos á que se referiu a directora de Medio Rural, o deputado replicou que no BNG, o asesoramento provén de expertos e especialistas que reclaman “estudos por comarcas”. Estes estudos, recalcou, ofrecerían as pautas necesarias cara os vindeiros anos. O porco bravo, explicou, é un fenómeno novidoso e a súa explosión demográfica non ten máis de 15 anos. “As batidas non son a única solución e inciden negativamente na fauna”. Hai que buscar outras alternativas.
O parlamentario do BNG insistiu na necesidade de recuperar as liñas de axudas para reparar os danos nos cultivos e propiedades así como nas estradas e cualificou de “incomprensible” que a Xunta deixara de pagar as axudas.
