127 asembleas abertas celebradas por todo o país con máis de 5.000 participantes, -o 60% non militantes-, permiten ao BNG facer unha valoración dun proceso que continúa e que puxo en marcha en setembro baixo o lema de Construíndo futuro.
Unha experiencia moi valiosa que reflicte dúas cuestións: que hai moita xente con inquedanza sobre o que está pasando no país e que hai moita xente que ve no BNG o instrumento útil para canalizar esas inquedanzas no plano político, resumía o portavoz nacional, Xavier Vence.
A acollida desta iniciativa leva ao BNG a converter as asembleas abertas nunha canle permanente de diálogo coa cidadanía para escoitar as súas propostas e críticas, incorporando tanto ideas como persoas para ampliar a base nacionalista e conformar unha alternativa de goberno ao PP. O proceso que naceu coa vista posta nas municipais, quere transcender ese marco electoral.
Máis aló das eleccións municipais queremos que serva para reforzar un proxecto político en clave nacional e de esquerda e de transformación social para darlle futuro ao país, explicou Vence, quen salientou que as asembleas abertas permiten compartir o proxecto do BNG coa base social que quere ter forzas políticas propias e unha alternativa diferente para este país, para as municipais e a máis longo prazo.
As asembleas abertas terán continuidade como ferramenta dese diálogo permanente coa base social nacionalista e de esquerdas, para canalizar as súas propostas que nos permita fortalecer o proxecto nacionalista, recalcou Vence, quen avanzou un segundo paso coa creación de grupos de traballo para elaborar o programa electoral das municipais cos participantes nesas asembleas.
Sentir maioritario
Vence resaltou a variedade de cuestións abordadas nas asembleas, incluídas críticas ao traballo do BNG, e destacou o sentir maioritario transmitido pol@s participantes de que Galiza necesita un proxecto político de país con forzas políticas propias, tanto para concorrer ás eleccións municipais como de cara ao futuro. Non houbo propostas para incorporarse a iniciativas de carácter meramente local, recalcou, o sentir da inmensa maioría é que se precisa un proxecto de país.
Esforzo de integración versus fragmentación
O dirixente nacionalista tamén explicou que outro asunto recorrente foi a preocupación por unha excesiva fragmentación do voto nacionalista e de esquerdas que beneficiaría ao PP.
Hai esa preocupación e compartímola todos. Este proceso forma parte do esforzo do Bloque por integrar, por sumar propostas e persoas para conformar unha alternativa forte, capaz de ilusionar á maioría social e ser referente ante a oferta centralista de PP e PSOE e ante as políticas da dereita que arrasan co país, salientou Vence.
Un obxectivo que non é posible nin desde a dialéctica das cúpulas, nin desde a dialéctica da fragmentación ata o infinito dalgunhas organizacións políticas, alegou o portavoz nacional, por iso no BNG apostamos pola dirección contraria: construír organización, sumar vontades desde un proxecto político nacionalista plural desde a esquerda para erguer unha alternativa ao PP.
Nas asembleas abertas quedou constatada que hai unha cidadanía rebelde que aposta por un proxecto nacional que inclúa a rexeneración real das institucións, que loite contra a corrupción, que poña os concellos ao servizo da cidadanía e que teñan proxecto de creación de riqueza nos seus concellos e solidarios cos máis maltratados pola crise, concluíu.
O Bloque analizará o resultado do proceso Construíndo futuro no Consello nacional previsto para o día 18 de outubro.
