Para o deputado, as propostas do informe do Comite de expertos sobre a refoma tributaria representan "un atraco" á cidadanía
O parlamentario nacionalista cualificou de vella táctica dos populares utilizar o Comité de expertos para que avalen propostas "ao servizo de determinados intereses" para que logo o Goberno introduza unha pequena rebaixa e dicir que non era para tanto".
O portavoz do Grupo parlamentario do BNG, Francisco Jorquera cualificou hoxe de interpretación psicodélica do PP definir como democracia participativa o encargo dun informe sobre a reforma do sistema tributario español a un Comité de expertos.
O nacionalista, que defendeu unha proposición non de lei para que o Parlamento galego rexeitara as recomendacións do comité, afirmou que o Partido popular volve a utilizar a vella táctica de escudarse en presuntos expertos que avalen proposta que resultan un auténtico atraco. Posteriormente, o Goberno introducirá unha pequena rebaixa sementando primeiro a alarma para dicir despois, non foi para tanto.
O grupo do PP que vote o que queira, dixo Jorquera, visiblemente enfadado, pero que non se cachondee da oposición porque está á espera de que sexa un feito consumado para aplicar as recomendacións dos expertos e moito menos non disfracen este encargo de democracia participativa. O propio Sr.Feijóo, engadiu lávase a cara dicindo que non lle importan as propostas e mesmo adianta que non aceptará ningunha das súas recomendacións para restar a Galiza a capacidade de financiamento dos servizos públicos, sen embargo, recalcou, estamos convencidos de que agarda a que sexa un feito consumado.
O BNG pode aportar 50 expertos que dirán todo o contrario do que dixeron os elixidos polo Partido popular polo que reiterou a súa petición para que o Goberno español non as teña en consideración por atentar contra a autonomía fiscal de Galiza.
O PP vota en contra da devolución do céntimo sanitario
Por outra parte, na comisión de economía celebrada, hoxe no Parlamento galego, o Partido popular tamén rexeitou outra iniciativa defendida polo portavoz do grupo parlamentario para reintegrar as cantidades abonadas polo céntimo sanitario.
Jorquera aludiu á sentenza do Tribunal de Xustiza da UE que declarou contrario ao dereito comunitario a aplicación deste imposto sobre os hidrocarburos, resulta evidente, manifestou, o grande alcance desta sentenza que cuestiona a estrutura impositiva que recae sobre os cidadáns e sectores económicos como o do transporte con grande peso na economía galega.
O deputado reclamou instar á Xunta a suprimir o tramo autonómico do céntimo sanitario e promover unha reforma fiscal progresiva para que pague máis quen máis teña e gravando as rendas do capital.
