O candidato do BNG á presidencia da Xunta, Francisco Jorquera, acusa ao presidente da Xunta de antepor os intereses do PP aos de Galiza ao votar finalmente a favor dun brutal recorte nas contas da Xunta, no Consello de Política Fiscal e Financeira.
Se a saúde das finanzas da Xunta de Galiza é tan boa como predica o señor Feijóo, pergúntase Jorquera, como é posíbel que se asuma un recorte do déficit da Xunta tan brutal como o que propón o señor Rajoy. Está claro que se asume porque o señor Feijóo carece de calquera autonomía política e está ás ordes do señor Rajoy, afirma Jorquera.
Feijóo cambiou o sentido de voto porque non foi quen de resistir as presións de Rajoy
Resulta patético que Galiza cambiase o seu sentido de voto, di Jorquera, en alusión a que en primeira instancia a Xunta íase abster e non ía dar o seu apoio á proposta do Goberno do Estado, tal e como fixeron Castela-León e Estremadura, tamén gobernadas polo PP. Cambiou o sentido do voto porque non foi quen de resistir as presións de Rajoy, di Jorquera.
O líder nacionalista alerta que o recorte nas contas da Xunta se irá traducir en menos gasto na sanidade e no ensino, os peares básicos do Estado de Benestar, que claramente o PP ambiciona privatizar.
