O portavoz nacional do BNG, Guillerme Vázquez, aproveitou o seu contacto deste martes cos meios para avaliar os novos dados do paro rexistrado.
Enfatizou Guillerme que no que atinxe a Galiza as estatísticas do paro rexistrado están distorsionadas porque non recollen o impacto da emigración.
O descenso circunstancial do paro en Galiza non ten a ver coa mellora da situación económica do País, tristemente, e si moito co feito de que moita xente nosa atopa traballo estacional nas Canarias ou nas Baleares, por pór un exemplo, considerou o portavoz nacional.
Baixa calidade do emprego
Guillerme alertou tamén sobre a baixa calidade do emprego que se está a criar nos últimos meses, tanto no que atinxe ás condicións salariais como ao feito de seren moi maioritariamente contratos temporais.
En termos interanuais, Guillerme advertiu que o paro continúa a medrar e salientou que a situación do emprego industrial comeza a ser desesperada.
Con Pemex ou sen Pemex a situación naval é crítica
Interpelado polos xornalistas a respeito da visita a Galiza de directivos de Pemex, o portavoz nacional cualificou de crítica a situación do sector naval.
Se se poñen tan rufos en Europa, por que non interpoñen un veto até que se arranxe a situación do naval?
Foron decisións de carácter político -a supresión do tax lease, o veto a Astano...- as que teñen abocado ao sector naval galego a unha parálise sen precedente. Esas decisións cámbianse se hai vontade política, afirmou Guillerme.
Se se poñen tan rufos nas cimeiras europeas, a ver cando o fan para interpor un veto até que se resolva a situación do naval galego, retou o portavoz nacional.
Verbo do presunto contrato de Pemex, dixo que ogallá que sexa realidade, ao tempo que subliñou que con Pemex ou sen Pemex, a situación do naval continuará a ser crítica mentres os gobernos galego e central non o defendan politicamente.
A verdade é que, máis alá dos cánticos oficiais, o de Pemex redúcese a unha visita duns directivos para ver se...Ou sexa, que todo está no ar. Con Pemex ou sen Pemex, o tema de fondo -a adopción de decisións políticas que nos teñen prexudicado, a urxencia por cambialas- segue sen ser abordado nin polo Goberno galego nin polo goberno estatal.