Ana Pontón presentou hoxe 40 propostas de resolución e avanzou que o BNG rexistrará 100 máis como protesta ante a restrición imposta polo Partido popular
Debate de Política Xeral. A viceportavoz do BNG, Ana Pontón presentou hoxe as 40 propostas de resolución avanzando a intención de rexistrar 100 máis como protesta pola redución imposta polo Partido popular, Galiza ten moitos problemas e resulta ilóxico restrinxir o debate e o número de propostas.
A parlamentaria agradeceu a participación de persoas e entidades que achegaron alternativas e propostas para loitar contra as consecuencias da crise, estarán presentes no debate, afirmou, e agardamos que o Partido popular sexa receptivo.
Pontón insistiu que a dependencia política imposibilita que Galiza exerza o dereito a decidir o seu futuro polo que é preciso poñer en marcha un modelo económico baseado nunha economía sustentábel priorizando a defensa do emprego, os servizos públicos e o dereito dos galegos e galegas a vivir con dignidade.
Cremos que a política actual conduce a Galiza ao desastre económico e cultural e onte mesmo comprobamos como Feijóo vive nunha dimensión paralela e nunha película mala de ciencia ficción.
Lamentamos que o presidente esqueza os problemas e as persoas no Debate de Política Xeral e sobre todo a falta de medidas para resolver a situación. Neste sentido, reclamou un cambio de rumbo como o recollido nas propostas de resolución do BNG.
Aumentar a democracia e abrir o Parlamento á cidadanía
Entre as propostas presentadas, destacou o dereito do pobo galego a decidir o noso futuro. Os problemas de Galiza non é o que fan bascos ou cataláns, o noso problema, recalcou é o centralismo que nos marxina e nos afoga e que conta coa colaboración dun presidente da Xunta inútil que nos condena a irrelevancia política.
No BNG acreditamos nas reformas democráticas e imos propoñer regular, nos próximos seis meses o regulamento da Cámara para axilizar os debates e reforzar a súa función de control penalizando ao Goberno cando non responda ou oculte información. Asemade defendemos crear unha comisión na que a cidadanía traslade as súas propostas abrindo á tribuna a todas as persoas que queiran participar.
Lei de consultas populares e Reforma electoral
Pontón censurou a intención do Partido popular de cambiar a lei electoral para recortar o Parlamento, ao seu xuízo, a reforma debe garantir que o voto de todos os galegos teñan o mesmo peso.Propoñemos dixo, abaratar os custes das campañas eliminando os envíos electorais para reducir en 2 millóns eses gastos.
Loitar pola democracia, engadiu, tamén é loitar contra a corrupción e nas propostas do BNG figura reabrir a comisión parlamentaria, eliminar as portas xiratorias, que o Consello de Contas fiscalice as incompatibilidades e transparencia nas declaracións de ben dos altos cargos e deputad@s. Queremos que se fagan públicos os convenios e contratos da Xunta para erradicar a opacidade.
Modelo de financiamento que discrimina a Galiza
A deputada lembrou que o actual modelo de financiamento prexudica a Galiza perdendo máis de 6.000 millóns de euros nos últimos anos polo que defendeu a plena territorialización do Imposto de Sociedades, que as empresas tributen en Galiza e se elimine a suba do céntimo sanitario no combustíbel.
Traballo digno e recuperación económica
Un Plan de emprego real e con dotación, que pasaría, explicou, por reclamar ao Goberno central os 300 millóns de euros que vai aforrar co remate das prestacións dos desempregad@s de longa duración.A mocidade e mulleres deben ser a prioridade do Plan de emprego, enfatizou.
Impulsar o sector naval, o agro e a pesca tamén son obxecto das propostas do BNG ao igual que a creación dunha banca pública galega como ferramenta fundamental para a recuperación económica.
A vista da nova documentación, o BNG tamén pedirá que se reactive a comisión de investigación das Caixas.
Unha tarifa eléctrica que rebaixe o prezo da luz porque, dixo, legalmente é posíbel.
Servizos públicos
Repoñer o persoal médico e profesorado suprimido no período de crise e garantir a lei da dependencia son eixos nos que o BNG incidirá no debate das propostas de resolución, hai que poñer en marcha un plan contra a pobreza e os desafiuzamentos. Sobre esta cuestión, avanzou que pedirá abrir unha liña de axudas para aquelas persoas que na actualidade non poden facer fronte o pago de hipotecas e alugueres.
Lingua galega
No decimo aniversario do Plan de Normalización Lingüística constamos o seu flagrante incumprimento polo que imos reclamar que se aplique así como a posta en marcha de medidas de apoio aos nosos creadores e creadoras.
Autoestradas libres de peaxe e tren moderno
Finalmente, a deputada volveu esixir a modernización do ferrocarril galego cun servizo que vertebre Galiza como están a facer todos os países avanzados, pedimos poñer en marcha unha compañía galega.
Sobre infraestruturas, o BNG pedirá paralizar a súa privatización por resultar un modelo fracasado. Non ten que haber cartos públicos para as concesionarias e as persoas usuarias da AP-9 non poden asumir esa fraude. A parlamentaria anunciou que entre as propostas do BNG figura converter esa autoestrada en libre de peaxe e pública.
Descargas:
Propostas de resolución presentadas polo BNG.
