A portavoz do BNG no Congreso, Olaia Fernández Davila, reprochou ao Ministro de Industria, que comparecía esta tarde no Congreso, que non denunciaran a outros estados da UE con sistemas de bonificación fiscais como Holanda, Franza e Alemaña.
Lembrou Davila que o BNG pedira a comparecencia do Ministro de Industria pero tamén a do titular de Economía e de Facenda. Entendemos que a situación actual do sector naval obriga ao Goberno a actuar de maneira urxente para tratar de revitalizar ao naval e evitar o estado de inactividade e de paro destes momentos.
A deputada do BNG ironizou coa afirmación do Ministro quen dixo que a UE ten por obxectivo prioritario a reindustrialización. Preguntámonos de que zona?, interpeloulle Davila a Soria, porque atendendo á secuencia dos feitos, o papel da UE é claramente o de obstruccionista da industria do estado español, en concreto a galega.
Para a parlamentar nacionalista, desde o ano 2011, mentras os estaleiros do estado español non puideron acceder á contratación de buques, outros estados da UE si o puideron facer. E aludo a Holanda que non só duplicou contratos como vosté dixo, senón que os triplicou, e o caso de Alemaña que os duplicou. A UE obstrúe o progreso do sector naval.
Por qué non denunciaron a Holanda, Franza e Alemaña?
Olaia Fernández Davila reprochou á UE que agora estean preocupados porque moitos contratos van para Asia, unha preocupación que nace porque existe unha denuncia sobre outros sistemas de bonificación fiscal como o holandés e o alemán. A inseguridade xurídica é a que está a levar os contratos a Asia. Como agora xa é un problema europeo é cando se preocupan.
Criticou ao Goberno español por non ter denunciado os sistemas de bonificación fiscal doutros estados como Holanda, Franza e Alemaña. Por que até agora non se denunciou a outros estados? Algo que o BNG reclamou durante meses.
Asegurar o financiamento ao sector naval
Davila dixo a Soria que Facenda ten que resolver como vai facer coa decisión da UE sobre o anterior Tax Lease. Hai que artellar medidas canto antes para garantir o financiamento ao sector naval para que poida ser competitivo, e que non teñan que pagar xuros ao 12 ou 14% de interese, e poidan acceder a xuros ao 4% como sucede noutros estados como o alemán.
A deputada do BNG formulou unha serie de cuestións ao Ministro sobre o novo Tax Lease: Existe seguridade xurídica co novo Tax Lease? En que situación de seguridade xurídica están os estaleiros para empezar a acceder a contratos?. Que medidas vai adoptar para asegurar o financiamento?.
E instou ao Ministro a aprobar axudas que permite a UE como as referidas ao I+D+I e que o estado español nunca puxo en marcha. Rematou criticando ao Goberno pola súa pasividade e por ter reaccionado moi tarde.
RESPOSTA DO MINISTRO DE INDUSTRIA AO BNG
Na súa resposta, o Ministro afirmou que o novo Tax Lease é un marco aceitado por parte da UE. Negou que o Goberno actuase con pasividade e considerou que estivemos moi activos. Concordou coa deputada do BNG no feito de que o obxectivo de reindustrialización da UE está cheo de contradiccións. E rematou asegurando que pensamos que o recurso o imos gañar.
