A deputada do BNG no Congreso, Olaia Fernández Davila, presentou hoxe unha proposición non de lei na Cámara Baixa na que insta ao Goberno a paralizar o novo sistema de copago farmacéutico que entrou en vigor o pasado 1 de xullo e que está ocasionando múltiples problemas.
Ademáis, o BNG demandou a celebración dunha Deputación Permanente para que se debata a necesidade dunha comparecencia urxente da Ministra de Sanidade por esta cuestión.
Davila pón de manifesto que a posta en marcha do novo sistema de repago farmacéutico está a xerar moitos problemas tanto aos usuarios como ás farmacias. A listaxe de queixas e problemas é moi longa e vai desde códigos de renda erróneos, coas conseguintes repercusións no tema da porcentaxe de pago, a recetas antigas, dados desfasados ou erros informáticos.
A situación de bloqueo é tal que os cidadáns afectados xa non saben nen a quen dirixir as súas queixas, se ao Miniterio de Sanidade ou ás CC.AA, explica a deputada do BNG. Davila lembra que aínda que a Administración central intente eludir as súas responsabilidades, hai unha cuestión que está claro e é que os dados fiscais dos cidadáns están en máns da Administración central, e polo tanto, se existen desfases nos dados dos pacientes é o Goberno central quen ten que solucionalo.
Pensionistas que non constan como tal
Un dos problemas máis graves é o relacionado con casos de pensionistas que segundo a nova lei deben pagar o 10% dos medicamentos, pero se lles aplica o 50% do custe debido a que os seus dados non están actualizados e non constan como pensionistas. Así, moitas farmacias e centros de saúde están a descubrir casos de persoas ás que se lles adxudicou un código de renda que non se corresponde coa realidade.
Davila subliña que este repago é unha medida moi criticada, moi cuestionada e que repercute sobre todo nas maiorías sociais máis desfavorecidas. O BNG se opuxo a esta medida inxusta porque empeora o servizo público pero tamén advertimos no seu día á Ministra das dificultades que ía xerar a súa posta en marcha, precisamente porque se producirían problemas no cruce de dados sobre a renda dos cidadáns.
A deputada do BNG critica as presas do Goberno, sobre todo cando se aplican decisións que só obedecen ao afán recadatorio e que non teñen en conta o aspeito humano. Por iso, empraza ao Executivo a paralizar o este proceso ante os numerosos problemas que está a provocar e evitar tolear a cidadáns e farmacias en cada intento de compra de medicamentos.